wahi shorish mue par bhi hai ab tak sath yan mere

vahī shorish mue par bhī hai ab tak saath yaañ mere

humā ke āshiyāne meñ jaleñ haiñ ustuḳhvāñ mere

azīzāñ ġham meñ apne yūsuf-e-gum-gashta ke har dam

chale jaate haiñ aañsū kārvāñ-dar-kārvāñ mere

tumhārī dushmanī ham dostoñ se lā-nihāyat hai

vagarna intihā kiine ko bhī hai mehrbāñ mere

lab-o-lahja ġhazal-ḳhvānī kā kis ko āj-kal aisā

ghaḌī bhar ko hue murġh-e-chaman ham-dāstāñ mere

nazar mat be-parī par kar ki āñ-sū-e-jahāñ phir huuñ

hue parvāz ke qābil ye TuuTe par jahāñ mere

kahāñ tak sar ko dīvāroñ se yuuñ maarā kare koī

rakhūñ us dar pe peshānī nasīb aise kahāñ mere

mujhe pāmāl kar yaksāñ kiyā hai ḳhaak se to bhī

vahī rahtā hai sub.h-o-shām darpe āsmāñ mere

ḳhizāñ kī baav se hazrat meñ gulshan ke tatāvul thā

tabarruk ho ga.e yak-dast ḳhār-e-āshiyāñ mere

kahā maiñ shauq meñ tiflān-e-tah-bāzār ke kyā kyā

suḳhan-mushtāq haiñ ab shahr ke pīr-o-javāñ mere

zamīñ sar par uThā lī kabk ne raftār-e-rangīñ se

ḳhirāmāñ naaz se ho tū bhī ai sarv-e-ravāñ mere

suḳhan kyā 'mīr' kariye hasrat-o-andoh-o-hirmāñ se

bayāñ hājat nahīñ hālāt haiñ saare 'ayāñ mere

wahi shorish mue par bhi hai ab tak sath yan mere

huma ke aashiyane mein jalen hain ustuKHwan mere

azizan gham mein apne yusuf-e-gum-gashta ke har dam

chale jate hain aansu karwan-dar-karwan mere

tumhaari dushmani hum doston se la-nihayat hai

wagarna intiha kine ko bhi hai mehrban mere

lab-o-lahja ghazal-KHwani ka kis ko aaj-kal aisa

ghaDi bhar ko hue murgh-e-chaman ham-dastan mere

nazar mat be-pari par kar ki aan-su-e-jahan phir hun

hue parwaz ke qabil ye TuTe par jahan mere

kahan tak sar ko diwaron se yun mara kare koi

rakhun us dar pe peshani nasib aise kahan mere

mujhe pamal kar yaksan kiya hai KHak se to bhi

wahi rahta hai subh-o-sham darpe aasman mere

KHizan ki baw se hazrat mein gulshan ke tatawul tha

tabarruk ho gae yak-dast KHar-e-ashiyan mere

kaha main shauq mein tiflan-e-tah-bazar ke kya kya

suKHan-mushtaq hain ab shahr ke pir-o-jawan mere

zamin sar par uTha li kabk ne raftar-e-rangin se

KHiraman naz se ho tu bhi ai sarw-e-rawan mere

suKHan kya 'mir' kariye hasrat-o-andoh-o-hirman se

bayan hajat nahin haalat hain sare 'ayan mere