wahshat mein hun bala gar wadi par apni aaun

vahshat meñ huuñ balā gar vaadī par apnī aa.uuñ

majnūñ kī mehnateñ sab maiñ ḳhaak meñ milā.ūñ

hañs kar kabhū bulāyā to barsoñ tak rulāyā

us kī sitam-zarīfī kis ke ta.iiñ dikhā.ūñ

fariyādī huuñ to Tapke lohū mirī zabāñ se

naale ko bulbuloñ ke ḳhātir meñ bhī na lā.ūñ

pūchho na dil ke ġham ko aisā na hove yārāñ

mānind-e-rauza-ḳhvāñ ke majlis ke tiiñ rulā.ūñ

lagtī hai aag tan meñ dekhe se daaġh is ke

is dil jale hue pe kitnā hī jī jalā.ūñ

ik dam tū chauñk bhī paḌ shor-o-fuġhāñ se mere

ai baḳht-e-ḳhufta kab tak tere ta.iiñ jagā.ūñ

az-ḳhvesh-rafta har-dam fikr-e-visāl meñ huuñ

kitnā maiñ khoyā jā.ūñ yā-rab ki tujh ko pā.ūñ

uryāñ-tanī kī shoḳhī vahshat meñ kyā balā thī

tah gard kī na baiThī tā tan ke tiiñ chhupā.ūñ

agle ḳhatoñ ne mere mutlaq asar na baḳhshā

qāsid ke badle ab ke jaadū magar chalā.ūñ

dil-taftagī ne maarā mujh ko kahāñ mizha de

ik qatra aab tā maiñ is aag ko bujhā.ūñ

āsūdgī to ma.alūm ai 'mīr' jiite jī yaañ

ārām tab hī pā.ūñ jab jī se haath uThā.ūñ

wahshat mein hun bala gar wadi par apni aaun

majnun ki mehnaten sab main KHak mein milaun

hans kar kabhu bulaya to barson tak rulaya

us ki sitam-zarifi kis ke tain dikhaun

fariyaadi hun to Tapke lohu meri zaban se

nale ko bulbulon ke KHatir mein bhi na laun

puchho na dil ke gham ko aisa na howe yaran

manind-e-rauza-KHwan ke majlis ke tin rulaun

lagti hai aag tan mein dekhe se dagh is ke

is dil jale hue pe kitna hi ji jalaun

ek dam tu chaunk bhi paD shor-o-fughan se mere

ai baKHt-e-KHufta kab tak tere tain jagaun

az-KHwesh-rafta har-dam fikr-e-visal mein hun

kitna main khoya jaun ya-rab ki tujh ko paun

uryan-tani ki shoKHi wahshat mein kya bala thi

tah gard ki na baiThi ta tan ke tin chhupaun

agle KHaton ne mere mutlaq asar na baKHsha

qasid ke badle ab ke jadu magar chalaun

dil-taftagi ne mara mujh ko kahan mizha de

ek qatra aab ta main is aag ko bujhaun

aasudgi to malum ai 'mir' jite ji yan

aaram tab hi paun jab ji se hath uThaun