we din ab salte hain jin mein phire yar ke sath

ve din ab sālte haiñ jin meñ phire yaar ke saath

lutf se harf-o-suḳhan the nigah ik pyaar ke saath

rū-ba-pas yaar ke kūche se jo ḳhurshīd gayā

'ishq thā us ke magar sāya-e-dīvār ke saath

daste nargis ke rakheñ gor pe merī vāris

tā ye jāneñ ki gayā maiñ ġham-e-dīdār ke saath

vaañ khiñchī myaan se yaañ sar ko jhukāyā maiñ ne

gardan apnī hai bañdhī yaar kī talvār ke saath

'ishq ke zaar se bolā na ḳhushūnat se karo

lutf se baat koī karte haiñ bīmār ke saath

tuhmat-e-‘ishq se ābādī bhī vaadī hai hameñ

kaun sohbat rakhe hai ḳhuuñ ke sazā-vār ke saath

ab ḳhushāmad unhīñ kī aaTh pahar karte haiñ

guftugū 'mīr' ko jin logoñ se thī 'aar ke saath

we din ab salte hain jin mein phire yar ke sath

lutf se harf-o-suKHan the nigah ek pyar ke sath

ru-ba-pas yar ke kuche se jo KHurshid gaya

'ishq tha us ke magar saya-e-diwar ke sath

daste nargis ke rakhen gor pe meri waris

ta ye jaanen ki gaya main gham-e-didar ke sath

wan khinchi myan se yan sar ko jhukaya main ne

gardan apni hai bandhi yar ki talwar ke sath

'ishq ke zar se bola na KHushunat se karo

lutf se baat koi karte hain bimar ke sath

tuhmat-e-‘ishq se aabaadi bhi wadi hai hamein

kaun sohbat rakhe hai KHun ke saza-war ke sath

ab KHushamad unhin ki aaTh pahar karte hain

guftugu 'mir' ko jin logon se thi 'ar ke sath