wo jo kashish thi uski taraf se kahan hai ab

vo jo kashish thī us kī taraf se kahāñ hai ab

tīr-o-kamāñ hai haath meñ siina nishāñ hai ab

itnā bhī muñh chhupānā ḳhat aa.e pe vaj.h kyā

laḌkā nahīñ hai nām-e-ḳhudā tū javāñ hai ab

phuul is chaman ke dekhte kyā kyā jhaḌe haiñ haa.e

sail-e-bahār āñkhoñ se merī ravāñ hai ab

jinn-o-malak zamīn-o-falak sab nikal ga.e

bār-e-girān-e-ishq-o-dil-e-nā-tavāñ hai ab

niklī thī us kī teġh hue ḳhush-nasīb log

gardan jhukā.ī maiñ to sunā ye amaañ hai ab

zardī-e-rang hai ġham-e-poshīda par dalīl

dil meñ jo kuchh hai muñh se hamāre ayaañ hai ab

pesh-az-dam-e-sahar mirā ronā lahū kā dekh

phūle hai jaise sāñjh vahī yaañ samāñ hai ab

nālāñ huī ki yaad hameñ sab ko de ga.ī

gulshan meñ andalīb hamārī zabāñ hai ab

barsoñ hue ga.e use par bhūltā nahīñ

yādash-ba-ḳhair 'mīr' rahe ḳhush jahāñ hai ab

wo jo kashish thi us ki taraf se kahan hai ab

tir-o-kaman hai hath mein sina nishan hai ab

itna bhi munh chhupana KHat aae pe wajh kya

laDka nahin hai nam-e-KHuda tu jawan hai ab

phul is chaman ke dekhte kya kya jhaDe hain hae

sail-e-bahaar aankhon se meri rawan hai ab

jinn-o-malak zamin-o-falak sab nikal gae

bar-e-giran-e-ishq-o-dil-e-na-tawan hai ab

nikli thi us ki tegh hue KHush-nasib log

gardan jhukai main to suna ye aman hai ab

zardi-e-rang hai gham-e-poshida par dalil

dil mein jo kuchh hai munh se hamare ayan hai ab

pesh-az-dam-e-sahar mera rona lahu ka dekh

phule hai jaise sanjh wahi yan saman hai ab

nalan hui ki yaad hamein sab ko de gai

gulshan mein andalib hamari zaban hai ab

barson hue gae use par bhulta nahin

yaadash-ba-KHair 'mir' rahe KHush jahan hai ab