ya pahle we nigahen jin se ki chah nikle

yā pahle ve nigāheñ jin se ki chaah nikle

yā ab kī ve adā.eñ jo dil se aah nikle

kyūñkar na chupke chupke yuuñ jaan se guzariye

kahiye bithā jo us se bātoñ kī raah nikle

zardī-e-rang-o-ronā donoñ dalīl-e-kushtan

ḳhush-tāla’ī se merī kyā kyā gavāh nikle

ai kām-e-jāñ hai tū bhī kyā riijh kā pachā.ū

mar jā.iye to muñh se tere na vaah nikle

ḳhūbī-o-dilkashī meñ sad-chand hai tū us se

tere muqāble ko kis muñh se maah nikle

yaañ mehr thī vafā thī vaañ jaur the sitam the

phir nikle bhī to mere ye hī gunāh nikle

ġhairoñ se tū kahe hai achchhī burī sab apnī

ai yaar kab ke tere ye ḳhair-ḳhvāh nikle

rakhte to ho mukaddar par us ghaḌī se dariyo

jab ḳhaak muñh pe mal kar ye rū-siyāh nikle

ik ḳhalq 'mīr' ke ab hotī hai āstāñ par

darvesh nikle hai yuuñ juuñ bādshāh nikle

ya pahle we nigahen jin se ki chah nikle

ya ab ki we adaen jo dil se aah nikle

kyunkar na chupke chupke yun jaan se guzariye

kahiye bitha jo us se baaton ki rah nikle

zardi-e-rang-o-rona donon dalil-e-kushtan

KHush-tala’i se meri kya kya gawah nikle

ai kaam-e-jaan hai tu bhi kya rijh ka pachau

mar jaiye to munh se tere na wah nikle

KHubi-o-dilkashi mein sad-chand hai tu us se

tere muqable ko kis munh se mah nikle

yan mehr thi wafa thi wan jaur the sitam the

phir nikle bhi to mere ye hi gunah nikle

ghairon se tu kahe hai achchhi buri sab apni

ai yar kab ke tere ye KHair-KHwah nikle

rakhte to ho mukaddar par us ghaDi se dariyo

jab KHak munh pe mal kar ye ru-siyah nikle

ek KHalq 'mir' ke ab hoti hai aastan par

darwesh nikle hai yun jun baadshah nikle