yan nam-e-yar kis ka wird-e-zaban na paya

yaañ nām-e-yār kis kā vird-e-zabāñ na paayā

par mutlaqan kahīñ ham us kā nishāñ na paayā

vaz.a-e-kashīda us kī rakhtī hai daaġh sab ko

nyotā kisū se ham vo abrū kamāñ na paayā

paayā na yuuñ ki kariye us kī taraf ishārat

yuuñ to jahāñ meñ ham ne us ko kahāñ na paayā

ye dil ki ḳhuun hove bar-jā na thā vagarna

vo kaun sī jagah thī us ko jahāñ na paayā

fitne kī garche baa.is āfāq meñ vahī thī

lekin kamar ko us kī ham darmiyāñ na paayā

mahrūm-e-sajda āḳhir jaanā paḌā jahāñ se

josh-e-jibāh se ham vo āstāñ na paayā

aisī hai 'mīr' kī bhī muddat se ronī sūrat

chehre pe us ke kis din aañsū ravāñ na paayā

yan nam-e-yar kis ka wird-e-zaban na paya

par mutlaqan kahin hum us ka nishan na paya

waza-e-kashida us ki rakhti hai dagh sab ko

nyota kisu se hum wo abru kaman na paya

paya na yun ki kariye us ki taraf ishaarat

yun to jahan mein hum ne us ko kahan na paya

ye dil ki KHun howe bar-ja na tha wagarna

wo kaun si jagah thi us ko jahan na paya

fitne ki garche bais aafaq mein wahi thi

lekin kamar ko us ki hum darmiyan na paya

mahrum-e-sajda aaKHir jaana paDa jahan se

josh-e-jibah se hum wo aastan na paya

aisi hai 'mir' ki bhi muddat se roni surat

chehre pe us ke kis din aansu rawan na paya