yar bin talKH zindagani thi

yaar bin talḳh zindagānī thī

dostī mudda.ā-e-jānī thī

sar se us kī havā ga.ī na kabhū

umr barbād yuuñ hī jaanī thī

lutf par us ke ham-nashīñ mat jā

kabhū ham par bhī mehrbānī thī

haath aatā jo tū to kyā hotā

barsoñ tak ham ne ḳhaak chhānī thī

sheb meñ fā.eda ta.ammul kā

sochnā tab thā jab javānī thī

mere qisse se sab kī ga.iiñ nīñdeñ

kuchh ajab taur kī kahānī thī

āshiqī jī hī le ga.ī āḳhir

ye balā koī nā-gahānī thī

us ruḳh-e-ātishīñ kī sharm se raat

sham.a majlis meñ paanī paanī thī

phir suḳhan nashnuī hai vaisī hī

raat ek aadh baat maanī thī

kū-e-qātil se bach ke niklā ḳhizr

isī meñ us kī zindagānī thī

faqr par bhī thā 'mīr' ke ik rang

kafnī pahnī so zāfrānī thī

yar bin talKH zindagani thi

dosti muddaa-e-jaani thi

sar se us ki hawa gai na kabhu

umr barbaad yun hi jaani thi

lutf par us ke ham-nashin mat ja

kabhu hum par bhi mehrbani thi

hath aata jo tu to kya hota

barson tak hum ne KHak chhani thi

sheb mein faeda tammul ka

sochna tab tha jab jawani thi

mere qisse se sab ki gain ninden

kuchh ajab taur ki kahani thi

aashiqi ji hi le gai aaKHir

ye bala koi na-gahani thi

us ruKH-e-atishin ki sharm se raat

shama majlis mein pani pani thi

phir suKHan nashnui hai waisi hi

raat ek aadh baat mani thi

ku-e-qatil se bach ke nikla KHizr

isi mein us ki zindagani thi

faqr par bhi tha 'mir' ke ek rang

kafni pahni so zafrani thi