ye choT khai aisi dil par ki ji ganwaya

ye choT khaa.ī aisī dil par ki jī gañvāyā

ya.anī judā.ī kā ham sadma baḌā uThāyā

muddat meñ vo huā shab ham-bistar aa ke merā

ḳhvābīda tāle.oñ ne ik ḳhvāb sā dikhāyā

uljhāo paḌ gayā so suljhī na apnī us kī

jhagḌe rahe bahut se guzre bahut qazāyā

ā.īna-rū hamārā aaya na naza.a meñ bhī

vaqt-e-aḳhīr un ne kyā ḳhuub muñh chhupāyā

is be-muravvatī ko kyā kahte haiñ batāo

ham maare bhī ga.e par vo na.ash par na aaya

vo rū-e-ḳhūb ab ke hargiz gayā na dil se

jab gul khilā chaman meñ tab daaġh ham ne khāyā

ḳhalta hamārā us kā hairat hī kī jagah hai

DhūñDā jahāñ ham us ko vaañ aap ko hī paayā

tarz-e-nigah se us kī behosh kyā huuñ maiñ hī

un mast añkhḌiyoñ ne bahuteroñ ko sulāyā

āñkheñ khulīñ to dekhā jo kuchh na dekhnā thā

ḳhvāb-e-adam se ham ko kaahe ke tiiñ jagāyā

baaqī nahīñ rahā kuchh ghaTte hī ghaTte ham meñ

bīmārī-e-dilī ne changā bahut banāyā

tū ne ki paañv dil se bāhar nahīñ rakhā hai

ayyār-pan ye kin ne tere ta.iiñ sikhāyā

kis din mulā.emat kī us but ne 'mīr' ham se

saḳhtī khiñche na kyūñkar patthar se dil lagāyā

ye choT khai aisi dil par ki ji ganwaya

yani judai ka hum sadma baDa uThaya

muddat mein wo hua shab ham-bistar aa ke mera

KHwabida taleon ne ek KHwab sa dikhaya

uljhao paD gaya so suljhi na apni us ki

jhagDe rahe bahut se guzre bahut qazaya

aaina-ru hamara aaya na naza mein bhi

waqt-e-aKHir un ne kya KHub munh chhupaya

is be-murawwati ko kya kahte hain batao

hum mare bhi gae par wo nash par na aaya

wo ru-e-KHub ab ke hargiz gaya na dil se

jab gul khila chaman mein tab dagh hum ne khaya

KHalta hamara us ka hairat hi ki jagah hai

DhunDa jahan hum us ko wan aap ko hi paya

tarz-e-nigah se us ki behosh kya hun main hi

un mast ankhDiyon ne bahuteron ko sulaya

aankhen khulin to dekha jo kuchh na dekhna tha

KHwab-e-adam se hum ko kahe ke tin jagaya

baqi nahin raha kuchh ghaTte hi ghaTte hum mein

bimari-e-dili ne changa bahut banaya

tu ne ki panw dil se bahar nahin rakha hai

ayyar-pan ye kin ne tere tain sikhaya

kis din mulaemat ki us but ne 'mir' hum se

saKHti khinche na kyunkar patthar se dil lagaya