ye rawish hai dilbaron ki na kisu se saz karna

ye ravish hai dilbaroñ kī na kisū se saaz karnā

koī ḳhaak se ho yaksāñ vahī un ko naaz karnā

koī āshiqoñ butāñ kī kare naql kyā ma.īshat

unheñ naaz karte rahnā unheñ jī niyāz karnā

rahīñ band merī āñkheñ shab-o-roz zo.af hī meñ

na huā mujhe mayassar kabhū chashm baaz karnā

ye bhī turfa mājrā hai ki usī ko chāhtā huuñ

mujhe chāhiye hai jis se bahut ehtirāz karnā

nahīñ kuchh rahā tū laḌkā tujhe par zarūr hai ab

havas aur āshiqī meñ Tuk ik imtiyāz karnā

koī āshiqoñ kī phappaT kinhoñ ne uThā.ī bhī hai

unheñ baat ho jo thoḌī use bhī darāz karnā

yahī 'mīr' khīñche qashqa dar-e-dair par the sājid

nahīñ e'timād qābil unhoñ kā namāz karnā

ye rawish hai dilbaron ki na kisu se saz karna

koi KHak se ho yaksan wahi un ko naz karna

koi aashiqon butan ki kare naql kya maishat

unhen naz karte rahna unhen ji niyaz karna

rahin band meri aankhen shab-o-roz zoaf hi mein

na hua mujhe mayassar kabhu chashm baz karna

ye bhi turfa majra hai ki usi ko chahta hun

mujhe chahiye hai jis se bahut ehtiraaz karna

nahin kuchh raha tu laDka tujhe par zarur hai ab

hawas aur aashiqi mein Tuk ek imtiyaz karna

koi aashiqon ki phappaT kinhon ne uThai bhi hai

unhen baat ho jo thoDi use bhi daraaz karna

yahi 'mir' khinche qashqa dar-e-dair par the sajid

nahin e'timad qabil unhon ka namaz karna