yun nakaam rahenge kab tak ji mein hai ek kaam karen

yuuñ nākām raheñge kab tak jī meñ hai ik kaam kareñ

rusvā ho kar maare jāveñ us ko bhī badnām kareñ

jin ko ḳhudā detā hai sab kuchh ve hī sab kuchh dete haiñ

Topī lañgoTī paas apne ham is par kyā in.aam kareñ

muñh khole to roz hai raushan zulf bikhere raat hai phir

in tauroñ se āshiq kyūñkar sub.h ko apnī shaam kareñ

ḳhatt-o-kitābat harf-o-hikāyat saf.ha varaq meñ aa jaave

daste ke daste kāġhaz ho jo dil kā haal irqām kareñ

shaiḳh paḌe mehrāb-e-haram meñ pahroñ dogānā paḌhte raho

sajda ek us teġh tale kā un se ho to salām kareñ

dil-āsūda ho to rahe Tuk dar par ham sau baar ga.e

vo so yahī kah bheje hai bāhar jāveñ ab ārām kareñ

mail-e-gadā.ī tab.a ko apnī kuchh bhī nahīñ hai varna 'mīr'

do-ālam ko maañg ke lāveñ ham jo tanik ibrām kareñ

yun nakaam rahenge kab tak ji mein hai ek kaam karen

ruswa ho kar mare jawen us ko bhi badnam karen

jin ko KHuda deta hai sab kuchh we hi sab kuchh dete hain

Topi langoTi pas apne hum is par kya inam karen

munh khole to roz hai raushan zulf bikhere raat hai phir

in tauron se aashiq kyunkar subh ko apni sham karen

KHatt-o-kitabat harf-o-hikayat safha waraq mein aa jawe

daste ke daste kaghaz ho jo dil ka haal irqam karen

shaiKH paDe mehrab-e-haram mein pahron dogana paDhte raho

sajda ek us tegh tale ka un se ho to salam karen

dil-asuda ho to rahe Tuk dar par hum sau bar gae

wo so yahi kah bheje hai bahar jawen ab aaram karen

mail-e-gadai taba ko apni kuchh bhi nahin hai warna 'mir'

do-alam ko mang ke lawen hum jo tanik ibram karen