zalim ye kya nikali raftar rafta-rafta

zālim ye kyā nikālī raftār rafta-rafta

is chaal par chalegī talvār rafta-rafta

har aan ham ko tujh bin ek ik baras huī hai

kyā aa gayā zamāna ai yaar rafta-rafta

kyā kahiye kyūñke jāneñ be-parda jātiyāñ haiñ

is ma.anī kā bhī hogā iz.hār rafta-rafta

ye hī sulūk us ke aksar chale ga.e to

baiTheñge apne ghar ham nā-chār rafta-rafta

pāmāl huuñ ki is meñ huuñ ḳhaak se barābar

ab ho gayā hai sab kuchh hamvār rafta-rafta

chāhat meñ daḳhl mat de zinhār aarzū ko

kar de hai dil kī ḳhvāhish bīmār rafta-rafta

ḳhātir na jam.a rakkho in palkoñ kī ḳhalish se

sar dil se kāḌhte haiñ yaañ ḳhaar rafta-rafta

the ek ham ve donoñ so ittihād kaisā

har baat par ab aa.ī takrār rafta-rafta

gar but-kade meñ jaanā aisā hai 'mīr' jī kā

to tār-e-sub.ha hogā zunnār rafta-rafta

zalim ye kya nikali raftar rafta-rafta

is chaal par chalegi talwar rafta-rafta

har aan hum ko tujh bin ek ek baras hui hai

kya aa gaya zamana ai yar rafta-rafta

kya kahiye kyunke jaanen be-parda jatiyan hain

is mani ka bhi hoga izhaar rafta-rafta

ye hi suluk us ke aksar chale gae to

baiThenge apne ghar hum na-chaar rafta-rafta

pamal hun ki is mein hun KHak se barabar

ab ho gaya hai sab kuchh hamwar rafta-rafta

chahat mein daKHl mat de zinhaar aarzu ko

kar de hai dil ki KHwahish bimar rafta-rafta

KHatir na jama rakkho in palkon ki KHalish se

sar dil se kaDhte hain yan KHar rafta-rafta

the ek hum we donon so ittihad kaisa

har baat par ab aai takrar rafta-rafta

gar but-kade mein jaana aisa hai 'mir' ji ka

to tar-e-subha hoga zunnar rafta-rafta