zar kiya bimar kiya is dil ne kya aazar kiya

zaar kiyā bīmār kiyā is dil ne kyā āzār kiyā

daaġh se tan gulzār kiyā sab āñkhoñ ko ḳhūñ-bār kiyā

jurm hai ham ulfat-kushtoñ kā lag paḌne se shoḳh huā

ab kahte haiñ dil meñ apne ham ne use kyoñ pyaar kiyā

chāhā ham ne kyā kyā thā par apnā chāhā kuchh na huā

izzat khoī zillat khīñchī ishq ne ḳhvār-o-zār kiyā

pesh ga.ī kab pesh-e-zamāna tab.a-e-ḳhashin har nā-kas kī

ik gardish meñ sipahr ne jaise sat.h-e-zamīñ hamvār kiyā

sādgī merī aah na jaanā jī hī is meñ jaatā hai

ishq kā us pur-kār ke maiñ ne logoñ meñ iqrār kiyā

zar kiya bimar kiya is dil ne kya aazar kiya

dagh se tan gulzar kiya sab aankhon ko KHun-bar kiya

jurm hai hum ulfat-kushton ka lag paDne se shoKH hua

ab kahte hain dil mein apne hum ne use kyon pyar kiya

chaha hum ne kya kya tha par apna chaha kuchh na hua

izzat khoi zillat khinchi ishq ne KHwar-o-zar kiya

pesh gai kab pesh-e-zamana taba-e-KHashin har na-kas ki

ek gardish mein sipahr ne jaise sath-e-zamin hamwar kiya

sadgi meri aah na jaana ji hi is mein jata hai

ishq ka us pur-kar ke main ne logon mein iqrar kiya