zard hain chehre sukh gae hain yani hain bimar bahut

zard haiñ chehre suukh ga.e haiñ ya.anī haiñ bīmār bahut

ishq kī garmī dil ko pahuñchī kahte hī āzār bahut

nāla-o-zārī se āshiq kī kyā abr-e-bahārī taraf hogā

dil hai nālāñ had se ziyāda āñkheñ haiñ ḳhūñ-bār bahut

barsoñ hue ab ham logoñ se aañkh unhoñ kī nahīñ miltī

barsoñ tak aapas meñ rahā hai apne jinhoñ ke pyaar bahut

arz-o-samā kī pastī bulandī ab to ham ko barābar hai

ya.anī nasheb-o-farāz jo dekhe tab.a huī hamvār bahut

sau ġhairoñ meñ ho āshiq to ek usī se sharmāveñ

is mastī meñ āñkheñ us kī rahtī haiñ hushiyār bahut

kam hai hameñ ummīd bahī se itnī nizārī par us kī

pichhle dinoñ dekhā thā ham ne āshiq the bīmār bahut

'mīr' na aisā hove kahīñ parde hī par vo maar mare

Dar lagtā hai us se ham ko hai vo zāhir-dār bahut

zard hain chehre sukh gae hain yani hain bimar bahut

ishq ki garmi dil ko pahunchi kahte hi aazar bahut

nala-o-zari se aashiq ki kya abr-e-bahaari taraf hoga

dil hai nalan had se ziyaada aankhen hain KHun-bar bahut

barson hue ab hum logon se aankh unhon ki nahin milti

barson tak aapas mein raha hai apne jinhon ke pyar bahut

arz-o-sama ki pasti bulandi ab to hum ko barabar hai

yani nasheb-o-faraaz jo dekhe taba hui hamwar bahut

sau ghairon mein ho aashiq to ek usi se sharmawen

is masti mein aankhen us ki rahti hain hushiyar bahut

kam hai hamein ummid bahi se itni nizari par us ki

pichhle dinon dekha tha hum ne aashiq the bimar bahut

'mir' na aisa howe kahin parde hi par wo mar mare

Dar lagta hai us se hum ko hai wo zahir-dar bahut