zof-e-dimagh se kya puchho ho ab to hum mein haal nahin

zo'f-e-dimāġh se kyā pūchho ho ab to ham meñ haal nahīñ

itnā hai ki tapish se dil kī sar par vo dhammāl nahīñ

gāhe-gāhe us meñ ham ne muñh us mah kā dekhā thā

jaisā saal ki par kā guzrā vaisā bhī ye saal nahīñ

bāloñ meñ us ke dil uljhā thā ḳhuub huā jo tamām huā

ya.anī gayā jab pech se jī hī tab phir kuchh janjāl nahīñ

aisī matā-e-qalīl ke uupar chashm na kholeñ ahl-e-nazar

aañkh meñ aave jo kuchh hove duniyā itnī maal nahīñ

sarv-chamāñ ko sair kiyā thā kabk-ḳhirāmāñ dekh liyā

us kā sā andāz na paayā us kī sī ye chaal nahīñ

dil to un meñ phañs jaatā hai jī Duube hai dekh udhar

chāh-e-zanaḳh go chaah nahīñ hai baal us ke go jaal nahīñ

kab tak dil ke TukḌe joḌūñ 'mīr' jigar ke laḳhtoñ se

kasb nahīñ hai pāra-dozī maiñ koī vassāl nahīñ

zo'f-e-dimagh se kya puchho ho ab to hum mein haal nahin

itna hai ki tapish se dil ki sar par wo dhammal nahin

gahe-gahe us mein hum ne munh us mah ka dekha tha

jaisa sal ki par ka guzra waisa bhi ye sal nahin

baalon mein us ke dil uljha tha KHub hua jo tamam hua

yani gaya jab pech se ji hi tab phir kuchh janjal nahin

aisi mata-e-qalil ke upar chashm na kholen ahl-e-nazar

aankh mein aawe jo kuchh howe duniya itni mal nahin

sarw-chaman ko sair kiya tha kabk-KHiraman dekh liya

us ka sa andaz na paya us ki si ye chaal nahin

dil to un mein phans jata hai ji Dube hai dekh udhar

chah-e-zanaKH go chah nahin hai baal us ke go jal nahin

kab tak dil ke TukDe joDun 'mir' jigar ke laKHton se

kasb nahin hai para-dozi main koi wassal nahin