ilaj-e-hijr zara aur karke dekhte hain

ilāj-e-hijr zarā aur karke dekhte haiñ

nazāre ham kisī rashk-e-qamar ke dekhte haiñ

ḳhumār-e-dīd se ham bhī sañvar ke dekhte haiñ

''sunā hai log use aañkh bhar ke dekhte haiñ

so us ke shahr meñ kuchh din Thahar ke dekhte haiñ''

hameñ kasak sī jo lāhaq hai chand sāloñ se

najāt paane ko jaate haiñ in malāloñ se

halāk hote haiñ us kī nigah ke bhāloñ se

''sunā hai rabt hai us ko ḳharāb-hāloñ se

so apne aap ko barbād karke dekhte haiñ

subū mizāj hai sad-chashm-e-naġhma-sāz us kī

vo be-niyāz nigah hai suḳhan-tarāz us kī

dil-e-shaqī se to achchhī hai sāz-bāz us kī

''sunā hai dard kī gāhak hai chashm-e-nāz us kī

so ham bhī us kī galī se guzar ke dekhte haiñ''

ġhazal sunāne kā us ko hameñ milā hai sharaf

suḳhan meñ ham ne banāyā jo us ko apnā hadaf

to uTh bhī saktī hai us kī nazar hamārī taraf

''sunā hai us ko bhī hai sher-o-shā.erī se shaġhaf

so ham bhī mo.ajize apne hunar ke dekhte haiñ''

vo muskurā.e to ruḳh par gaḌhe se paḌte haiñ

laboñ ko chhūte haiñ alfāz to sañvarte haiñ

jo lams paate haiñ hoñToñ kā to nikharte haiñ

''sunā hai bole to bātoñ se phuul jhaḌte haiñ

ye baat hai to chalo baat karke dekhte haiñ''

vahī to hai jise har ek chāñd kahtā hai

vo jis ke nuur meñ sūraj kiran sā bahtā hai

vo jis ke hijr ko sūraj bhī chhup ke sahtā hai

''sunā hai raat use chāñd taktā rahtā hai

sitāre bām-e-falak se utar ke dekhte haiñ''

ki us kī zulf pe to badliyāñ khul aatī haiñ

usī kī diid pe ye qumriyāñ bhī gaatī haiñ

usī ke nuur meñ to bijliyāñ nahātī haiñ

''sunā hai din ko use titliyāñ satātī haiñ

sunā hai raat ko jugnū Thahar ke dekhte haiñ''

bahut hasīn haiñ us kī ḳhayāl sī āñkheñ

vafūr-e-bāda se rangīñ gulāl sī āñkheñ

jo un meñ jhāñk ke dekho to Dhaal sī āñkheñ

''sunā hai hashr haiñ us kī ġhazāl sī āñkheñ

sunā hai us ko hiran dasht bhar ke dekhte haiñ''

ki rasmasā ke sanā-gar haiñ koñpleñ us kī

sunā hai kaif kā mehvar haiñ mahfileñ us kī

sunā hai shauq se bartar haiñ manzileñ us kī

''sunā hai raat se baḌh kar haiñ kākuleñ us kī

sunā hai shaam ko saa.e guzar ke dekhte haiñ''

sunā hai ġhuncha-dahan sirr-e-sad-malāhat hai

sunā hai jān-e-ġhazal sar-basar sabāhat hai

sunā hai us kī ajab rustaḳhez qāmat hai

''sunā hai us kī siyah-chashmagī qayāmat hai

so us ko surma-farosh aah bhar ke dekhte haiñ''

jo muskurā.e to yāqūt-e-lab bahalte haiñ

sunā hai us ke tabassum se dil pighalte haiñ

aqīq-hoñToñ pe jab qahqahe machalte haiñ

''sunā hai us ke laboñ se gulāb jalte haiñ

so ham bahār pe ilzām dhar ke dekhte haiñ''

hai baat aur hī aur har adā hasīñ us kī

sabā ke dosh pe vo zulf-e-ambarīñ us kī

ki dil pe qahr haiñ bāteñ vo dil-nashīñ us kī

''sunā hai ā.ina-timsāl hai jabīñ us kī

jo saada dil haiñ use ban-sañvar ke dekhte haiñ''

ki dekhte jo haiñ ḳhud ko vo us ke darpan meñ

hue haiñ itne vo mas.hūr us kī ban-Than meñ

vo ḳhud ko bhuul ke kho.e haiñ ik na.e-pan meñ

''sunā hai jab se hamā.il haiñ is kī gardan meñ

mizāj aur hī la.al-o-gohar ke dekhte haiñ''

sunā hai lams ko paane ke us ke armāñ meñ

vafūr-e-kaif ke afsūñ meñ shauq-e-jānāñ meñ

isī ḳhayāl meñ kho kar kabhī shabistāñ meñ

''sunā hai chashm-e-tasavvur se dasht-e-imkāñ meñ

palañg zāviye us kī kamar ke dekhte haiñ''

ġhurūr-e-husn ke phūloñ kī aisī-taisī hai

go ḳhushbū un kī bhī bilkul usī ke jaisī hai

par un kī aan yahāñ paash paash kaisī hai

''sunā hai us ke badan kī tarāsh aisī hai

ki phuul apnī qabā.eñ katar ke dekhte haiñ''

nazīr koī bhī us kā sar-e-bilād nahīñ

koī bhī husn meñ us husn se ziyād nahīñ

nahīñ jo dekh ke us ko koī jo shaad nahīñ

''vo sarv-qad hai magar be-gul-e-murād nahīñ

ki is shajar pe shagūfe samar ke dekhte haiñ''

ajiib chiiz hai jalva jamāl-e-kāmil kā

haTe kabhī ki jo parda hai us ke mahmil kā

ḳhayāl phir nahīñ rahtā hai koī manzil kā

''bas ik nigāh se luTtā hai qāfila dil kā

so rah-ravān-e-tamannā bhī Dar ke dekhte haiñ''

sunā hai us ke shabistāñ se munfa.il hai bahisht

sunā hai us ke shabistāñ se muzmahil hai bahisht

sunā hai us ke shabistāñ se mundamil hai bahisht

''sunā hai us ke shabistāñ se muttasil hai bahisht

makīñ udhar ke bhī jalve idhar ke dekhte haiñ''

chale to gardisheñ sab e'tirāf kartī haiñ

chale to rāsta us kā vo saaf kartī haiñ

chale to us ke salīqe kā laaf kartī haiñ

''ruke to gardisheñ us kā tavāf kartī haiñ

chale to us ko zamāne Thahar ke dekhte haiñ''

ḳhayāl-o-ḳhvāb kī ik anjuman use dekhe

aur is tarah ki bad-dīvāna-pan use dekhe

kabhī darīche se guzrī pavan use dekhe

''kise nasīb ki be-pairahan use dekhe

kabhī kabhī dar-o-dīvār ghar ke dekhte haiñ''

ajab junūñ ke ye apne muālije hī sahī

dil-e-ġharīb ke apne muġhālate hī sahī

ye bālak-haT ke sabab ke mutālbe hī sahī

''kahāniyāñ hī sahī sab mubālġhe hī sahī

agar vo ḳhvāb hai ta.abīr karke dekhte haiñ''

usī ke kūche meñ rah leñ ki dar-ba-dar jaa.eñ

usī ke dar pe hī baiTheñ yā apne ghar jaa.eñ

ab us ke shahr ko chhoḌeñ yā is meñ mar jaa.eñ

''ab us ke shahr meñ Thahreñ ki kuuch kar jaa.eñ

'farāz' aao sitāre safar ke dekhte haiñ''

ilaj-e-hijr zara aur karke dekhte hain

nazare hum kisi rashk-e-qamar ke dekhte hain

KHumar-e-did se hum bhi sanwar ke dekhte hain

suna hai log use aankh bhar ke dekhte hain

so us ke shahr mein kuchh din Thahar ke dekhte hain

hamein kasak si jo lahaq hai chand salon se

najat pane ko jate hain in malalon se

halak hote hain us ki nigah ke bhaalon se

suna hai rabt hai us ko KHarab-haalon se

so apne aap ko barbaad karke dekhte hain

subu mizaj hai sad-chashm-e-naghma-saz us ki

wo be-niyaz nigah hai suKHan-taraaz us ki

dil-e-shaqi se to achchhi hai saz-baz us ki

suna hai dard ki gahak hai chashm-e-naz us ki

so hum bhi us ki gali se guzar ke dekhte hain

ghazal sunane ka us ko hamein mila hai sharaf

suKHan mein hum ne banaya jo us ko apna hadaf

to uTh bhi sakti hai us ki nazar hamari taraf

suna hai us ko bhi hai sher-o-shaeri se shaghaf

so hum bhi moajize apne hunar ke dekhte hain

wo muskurae to ruKH par gaDhe se paDte hain

labon ko chhute hain alfaz to sanwarte hain

jo lams pate hain honTon ka to nikharte hain

suna hai bole to baaton se phul jhaDte hain

ye baat hai to chalo baat karke dekhte hain

wahi to hai jise har ek chand kahta hai

wo jis ke nur mein suraj kiran sa bahta hai

wo jis ke hijr ko suraj bhi chhup ke sahta hai

suna hai raat use chand takta rahta hai

sitare baam-e-falak se utar ke dekhte hain

ki us ki zulf pe to badliyan khul aati hain

usi ki did pe ye qumriyan bhi gati hain

usi ke nur mein to bijliyan nahati hain

suna hai din ko use titliyan satati hain

suna hai raat ko jugnu Thahar ke dekhte hain

bahut hasin hain us ki KHayal si aankhen

wafur-e-baada se rangin gulal si aankhen

jo un mein jhank ke dekho to Dhaal si aankhen

suna hai hashr hain us ki ghazal si aankhen

suna hai us ko hiran dasht bhar ke dekhte hain

ki rasmasa ke sana-gar hain konplen us ki

suna hai kaif ka mehwar hain mahfilen us ki

suna hai shauq se bartar hain manzilen us ki

suna hai raat se baDh kar hain kakulen us ki

suna hai sham ko sae guzar ke dekhte hain

suna hai ghuncha-dahan sirr-e-sad-malahat hai

suna hai jaan-e-ghazal sar-basar sabahat hai

suna hai us ki ajab rustaKHez qamat hai

suna hai us ki siyah-chashmagi qayamat hai

so us ko surma-farosh aah bhar ke dekhte hain

jo muskurae to yaqut-e-lab bahalte hain

suna hai us ke tabassum se dil pighalte hain

aqiq-honTon pe jab qahqahe machalte hain

suna hai us ke labon se gulab jalte hain

so hum bahaar pe ilzam dhar ke dekhte hain

hai baat aur hi aur har ada hasin us ki

saba ke dosh pe wo zulf-e-ambarin us ki

ki dil pe qahr hain baaten wo dil-nashin us ki

suna hai aaina-timsal hai jabin us ki

jo sada dil hain use ban-sanwar ke dekhte hain

ki dekhte jo hain KHud ko wo us ke darpan mein

hue hain itne wo mashur us ki ban-Than mein

wo KHud ko bhul ke khoe hain ek nae-pan mein

suna hai jab se hamail hain is ki gardan mein

mizaj aur hi lal-o-gohar ke dekhte hain

suna hai lams ko pane ke us ke arman mein

wafur-e-kaif ke afsun mein shauq-e-jaanan mein

isi KHayal mein kho kar kabhi shabistan mein

suna hai chashm-e-tasawwur se dasht-e-imkan mein

palang zawiye us ki kamar ke dekhte hain

ghurur-e-husn ke phulon ki aisi-taisi hai

go KHushbu un ki bhi bilkul usi ke jaisi hai

par un ki aan yahan pash pash kaisi hai

suna hai us ke badan ki tarash aisi hai

ki phul apni qabaen katar ke dekhte hain

nazir koi bhi us ka sar-e-bilad nahin

koi bhi husn mein us husn se ziyaad nahin

nahin jo dekh ke us ko koi jo shad nahin

wo sarw-qad hai magar be-gul-e-murad nahin

ki is shajar pe shagufe samar ke dekhte hain

ajib chiz hai jalwa jamal-e-kaamil ka

haTe kabhi ki jo parda hai us ke mahmil ka

KHayal phir nahin rahta hai koi manzil ka

bas ek nigah se luTta hai qafila dil ka

so rah-rawan-e-tamanna bhi Dar ke dekhte hain

suna hai us ke shabistan se munfail hai bahisht

suna hai us ke shabistan se muzmahil hai bahisht

suna hai us ke shabistan se mundamil hai bahisht

suna hai us ke shabistan se muttasil hai bahisht

makin udhar ke bhi jalwe idhar ke dekhte hain

chale to gardishen sab e'tiraf karti hain

chale to rasta us ka wo saf karti hain

chale to us ke saliqe ka laf karti hain

ruke to gardishen us ka tawaf karti hain

chale to us ko zamane Thahar ke dekhte hain

KHayal-o-KHwab ki ek anjuman use dekhe

aur is tarah ki bad-diwana-pan use dekhe

kabhi dariche se guzri pawan use dekhe

kise nasib ki be-pairahan use dekhe

kabhi kabhi dar-o-diwar ghar ke dekhte hain

ajab junun ke ye apne mualije hi sahi

dil-e-gharib ke apne mughaalate hi sahi

ye baalak-haT ke sabab ke mutalbe hi sahi

kahaniyan hi sahi sab mubaalghe hi sahi

agar wo KHwab hai tabir karke dekhte hain

usi ke kuche mein rah len ki dar-ba-dar jaen

usi ke dar pe hi baiThen ya apne ghar jaen

ab us ke shahr ko chhoDen ya is mein mar jaen

ab us ke shahr mein Thahren ki kuch kar jaen

'faraaz' aao sitare safar ke dekhte hain