kunjashk-o-darna taza-dam lala kanwal aur nastaran

kunjashk-o-darnā tāza-dam laala kañval aur nastaran

vo bulbul-o-tā.ūs-o-gul vo kaukab aur vo yāsman

gul-hā-e-sad-rangīñ-qabā murġhān-e-sad-shīrīñ-dahan

''gulshan kaho tum yā chaman hai ahl-e-dil kī anjuman

sad bulbul-e-shorīda-sar sad lāla-e-ḳhūnīñ-kafan''

vo bāġh-e-yak-mīnu-sifat ganjīna-e-sarv-o-saman

mas.hūr-kun vo chahchahe vo lahn-e-sad-nāz-e-suḳhan

hai ambarīñ jis kī fazā mushk-e-ḳhutan jis kī pavan

''is baaġh meñ aatī hai ik mahbūba-e-gul-pairahan

shīrīñ-navā shīrīñ-adā shīrīñ-suḳhan shīrīñ-dahan''

vo hai ilāj-e-dard-e-dil dil kī magar halchal bhī hai

vo āshnā-e-ġham bhī hai lekin bahut chanchal bhī hai

vo jalva-e-māh-e-mubīñ vo nāznīñ sāñval bhī hai

''vo gul bhī hai sūraj bhī hai bijlī bhī hai bādal bhī hai

dekhā na thā pahle kabhī aisā hasīñ bāñkā sajan''

aise vo aaya māh-rū ausān sab ke aa liye

nok aur palak ab sher kī kyā dekhiye kyā bhāliye

ash ash ke is tūfān ko āḳhir kahāñ tak Tāliye

''paikar ko us ke sher ke paikar meñ kyūñkar Dhāliye

ḳhāmosh haiñ hairān haiñ sab shahryārān-e-suḳhan''

bulbul sī vo naġhma-kunāñ muskān ġhunche kī chaTak

tevar vo bijlī kī lapak lālīñ vo aariz kī dhanak

zulfoñ meñ ambar kī mahak āñkhoñ meñ tāroñ kī damak

''peshāni-e-sīmīñ hai yā sub.h-e-taḳhayyul kī chamak

shā.istagī-e-fikr-o-fan us ke tabassum kī kiran''

vo husn sā pā.inda hai vo maah sā raḳhshanda hai

behad hī vo baḳhshinda hai aur sab se hī zebinda hai

jo dekh le farḳhanda hai chāhe jo us ko zinda hai

''hūr-o-parī sharminda hai vo is qadar tābinda hai

dekhe se nikhre rang-e-ruḳh chhūne se mailā ho badan''

chāho bahut sunte raho us zindagī ke saaz ko

dil meñ hī bas rakkho magar tum uns ke us raaz ko

jo kuchh bhī ho tum chhūnā mat us paikar-e-andāz ko

''bas duur se dekhā karo us sham.a-e-bazm-e-nāz ko

vo raunaq-e-kāshāna-e-dil hairat-e-sad-anjuman''

bātoñ meñ us kī hai ayaañ vāzeh ye mub.ham kaun hai

sochoñ meñ us kī dam-ba-dam maujūd paiham kaun hai

tanhā.ī ke is dasht meñ ye us kā hamdam kaun hai

''aao chaleñ dekheñ zarā vo jān-e-ālam kaun hai

'sardār' ke sheroñ meñ hai zulf-e-mo.ambar kī shikan''

kunjashk-o-darna taza-dam lala kanwal aur nastaran

wo bulbul-o-taus-o-gul wo kaukab aur wo yasman

gul-ha-e-sad-rangin-qaba murghan-e-sad-shirin-dahan

gulshan kaho tum ya chaman hai ahl-e-dil ki anjuman

sad bulbul-e-shorida-sar sad lala-e-KHunin-kafan

wo bagh-e-yak-minu-sifat ganjina-e-sarw-o-saman

mashur-kun wo chahchahe wo lahn-e-sad-naz-e-suKHan

hai ambarin jis ki faza mushk-e-KHutan jis ki pawan

is bagh mein aati hai ek mahbuba-e-gul-pairahan

shirin-nawa shirin-ada shirin-suKHan shirin-dahan

wo hai ilaj-e-dard-e-dil dil ki magar halchal bhi hai

wo aashna-e-gham bhi hai lekin bahut chanchal bhi hai

wo jalwa-e-mah-e-mubin wo naznin sanwal bhi hai

wo gul bhi hai suraj bhi hai bijli bhi hai baadal bhi hai

dekha na tha pahle kabhi aisa hasin banka sajan

aise wo aaya mah-ru ausan sab ke aa liye

nok aur palak ab sher ki kya dekhiye kya bhaaliye

ash ash ke is tufan ko aaKHir kahan tak Taliye

paikar ko us ke sher ke paikar mein kyunkar Dhaaliye

KHamosh hain hairan hain sab shahryaran-e-suKHan

bulbul si wo naghma-kunan muskan ghunche ki chaTak

tewar wo bijli ki lapak lalin wo aariz ki dhanak

zulfon mein ambar ki mahak aankhon mein taron ki damak

peshani-e-simin hai ya subh-e-taKHayyul ki chamak

shaistagi-e-fikr-o-fan us ke tabassum ki kiran

wo husn sa painda hai wo mah sa raKHshanda hai

behad hi wo baKHshinda hai aur sab se hi zebinda hai

jo dekh le farKHanda hai chahe jo us ko zinda hai

hur-o-pari sharminda hai wo is qadar tabinda hai

dekhe se nikhre rang-e-ruKH chhune se maila ho badan

chaho bahut sunte raho us zindagi ke saz ko

dil mein hi bas rakkho magar tum uns ke us raaz ko

jo kuchh bhi ho tum chhuna mat us paikar-e-andaz ko

bas dur se dekha karo us shama-e-bazm-e-naz ko

wo raunaq-e-kashana-e-dil hairat-e-sad-anjuman

baaton mein us ki hai ayan wazeh ye mubham kaun hai

sochon mein us ki dam-ba-dam maujud paiham kaun hai

tanhai ke is dasht mein ye us ka hamdam kaun hai

aao chalen dekhen zara wo jaan-e-alam kaun hai

'sardar' ke sheron mein hai zulf-e-moambar ki shikan