ajab shan-e-shah-e-umam dekhte hain

'ajab shān-e-shāh-e-umam dekhte haiñ

malā.ik ko bhī sar-ba-ḳham dekhte haiñ

vo mehmān-e-yazdāñ ki fart-e-adab se

falak ko bhī zer-e-qadam dekhte haiñ

jalāl-o-jamāl-e-ḳhudā ke nazāre

tirī zāt-e-aqdas meñ ham dekhte haiñ

zamīñ se falak tak bashar se malak tak

ravāñ bahr-e-faiz-o-karam dekhte haiñ

vo hoñ 'arsh-o-kursī ki lauh-o-qalam hoñ

jamāl-e-nabī un meñ ham dekhte haiñ

payambar haiñ sab raunaq-e-bazm lekin

unheñ sab meñ ham muhtasham dekhte haiñ

mah-o-mehr-o-anjum batā.eñ ḳhudārā

ki ab kyā vo shān-e-haram dekhte haiñ

sahārā vo dete haiñ tūfān-e-ġham meñ

jahāñ Dagmagāte qadam dekhte haiñ

na jāneñ huiiñ ham se kyā kyā ḳhatā.eñ

idhar āj-kal aap kam dekhte haiñ

shahīdān-e-dīn-e-nabī kā ye rutba

ki dīdār-e-haq dam-ba-dam dekhte haiñ

chale ham madīne ko yuuñ vālihāna

ḳhushī dekhte haiñ na ġham dekhte haiñ

ġham-e-mustafā meñ ye rotī haiñ itnā

ki āñkhoñ meñ aksar varam dekhte haiñ

pahuñch kar raheñge madīne meñ 'mahvī'

ye dam-ḳham abhī dil meñ ham dekhte haiñ

'ajab shan-e-shah-e-umam dekhte hain

malaik ko bhi sar-ba-KHam dekhte hain

wo mehman-e-yazdan ki fart-e-adab se

falak ko bhi zer-e-qadam dekhte hain

jalal-o-jamal-e-KHuda ke nazare

teri zat-e-aqdas mein hum dekhte hain

zamin se falak tak bashar se malak tak

rawan bahr-e-faiz-o-karam dekhte hain

wo hon 'arsh-o-kursi ki lauh-o-qalam hon

jamal-e-nabi un mein hum dekhte hain

payambar hain sab raunaq-e-bazm lekin

unhen sab mein hum muhtasham dekhte hain

mah-o-mehr-o-anjum bataen KHudara

ki ab kya wo shan-e-haram dekhte hain

sahaara wo dete hain tufan-e-gham mein

jahan Dagmagate qadam dekhte hain

na jaanen huin hum se kya kya KHataen

idhar aaj-kal aap kam dekhte hain

shahidan-e-din-e-nabi ka ye rutba

ki didar-e-haq dam-ba-dam dekhte hain

chale hum madine ko yun walihana

KHushi dekhte hain na gham dekhte hain

gham-e-mustafa mein ye roti hain itna

ki aankhon mein aksar waram dekhte hain

pahunch kar rahenge madine mein 'mahwi'

ye dam-KHam abhi dil mein hum dekhte hain