allah ne yun shan baDhai tere dar ke

allāh ne yuuñ shaan baḌhā.ī tire dar kī

baḳhshī hai malā.ik ko gadā.ī tire dar kī

paane ko to ḳhurshīd-o-qamar charḳh ne paa.e

kyā paayā agar ḳhaak na paa.ī tire dar kī

jannat ne utāre to bahut nuur ke naqshe

tasvīr magar haath na aa.ī tire dar kī

hūroñ ne malā.ik ne ajinnā ne bashar ne

kis kis ne kahāñ bhiik na paa.ī tire dar kī

allāh ke ghar se hai rasā.ī tire dar tak

allāh ke ghar tak hai rasā.ī tire dar kī

le jā.egī ik din mujhe taiba meñ uḌā kar

jis vaqt havā jhuum kar aa.ī tire dar kī

mahshar meñ bhī is shaan se jā.uñgā 'munavvar'

rakkhe hue kāñdhe pe chaTā.ī tire dar kī

allah ne yun shan baDhai tere dar ki

baKHshi hai malaik ko gadai tere dar ki

pane ko to KHurshid-o-qamar charKH ne pae

kya paya agar KHak na pai tere dar ki

jannat ne utare to bahut nur ke naqshe

taswir magar hath na aai tere dar ki

huron ne malaik ne ajinna ne bashar ne

kis kis ne kahan bhik na pai tere dar ki

allah ke ghar se hai rasai tere dar tak

allah ke ghar tak hai rasai tere dar ki

le jaegi ek din mujhe taiba mein uDa kar

jis waqt hawa jhum kar aai tere dar ki

mahshar mein bhi is shan se jaunga 'munawwar'

rakkhe hue kandhe pe chaTai tere dar ki