faslon ko takalluf hai humse agar hum bhi bebas nahin be-sahaara nahin

fāsloñ ko takalluf hai ham se agar ham bhī bebas nahīñ be-sahārā nahīñ

ḳhud unhī ko pukāreñge ham duur se rāste meñ agar paañv thak jā.eñge

ham madīne meñ tanhā nikal jā.eñge aur galiyoñ meñ qasdan bhaTak jā.eñge

ham vahāñ jā ke vāpas nahīñ ā.eñge DhūñDte DhūñDte log thak jā.eñge

jaise hī sabz gumbad nazar aa.egā bandagī kā qarīna badal jā.egā

sar jhukāne kī fursat milegī kise ḳhud hī palkoñ se sajde Tapak jā.eñge

nām-e-āqā jahāñ bhī liyā jā.egā zikr un kā jahāñ bhī kiyā jā.egā

nuur hī nuur sīnoñ meñ bhar jā.egā saarī mahfil meñ jalve lapak jā.eñge

ai madīne ke zaa.er ḳhudā ke liye dāstan-e-safar mujh ko yuuñ mat sunā

baat baḌh jā.egī dil taḌap jā.egā mere mohtāt aañsū chhalak jā.eñge

un kī chashm-e-karam ko hai is kī ḳhabar kis musāfir ko hai kitnā shauq-e-safar

ham ko 'iqbāl' jab bhī ijāzat milī ham bhī aaqā ke darbār tak jā.eñge

faslon ko takalluf hai hum se agar hum bhi bebas nahin be-sahaara nahin

KHud unhi ko pukarenge hum dur se raste mein agar panw thak jaenge

hum madine mein tanha nikal jaenge aur galiyon mein qasdan bhaTak jaenge

hum wahan ja ke wapas nahin aaenge DhunDte DhunDte log thak jaenge

jaise hi sabz gumbad nazar aaega bandagi ka qarina badal jaega

sar jhukane ki fursat milegi kise KHud hi palkon se sajde Tapak jaenge

nam-e-aqa jahan bhi liya jaega zikr un ka jahan bhi kiya jaega

nur hi nur sinon mein bhar jaega sari mahfil mein jalwe lapak jaenge

ai madine ke zaer KHuda ke liye dastan-e-safar mujh ko yun mat suna

baat baDh jaegi dil taDap jaega mere mohtat aansu chhalak jaenge

un ki chashm-e-karam ko hai is ki KHabar kis musafir ko hai kitna shauq-e-safar

hum ko 'iqbaal' jab bhi ijazat mili hum bhi aaqa ke darbar tak jaenge