hanste hue marne ki dua mang raha hun

hañste hue marne kī du'ā maañg rahā huuñ

bīmār nabī kā huuñ davā maañg rahā huuñ

ab shahr meñ pur-kaif fazā maañg rahā huuñ

gesu-e-mu’ambar kī havā maañg rahā huuñ

ai bād-e-sabā ḳhāk-e-madīna hī uThā lā

be-nūr nigāhoñ kī ziyā maañg rahā huuñ

ik baar bhī taiba kī ziyārat ho mayassar

sarkār kī sarkār meñ kyā maañg rahā huuñ

jannat kī talab hai na ḳhazāne kī tamanna

ik nazr-e-karam roz-e-jazā maañg rahā huuñ

gulzār-e-madīna kī taraf aañkh jhukā kar

bulbul se chahakne kī adā maañg rahā huuñ

sab jūd-o-karam māñgeñ ḳhudā se 'shamīm-anjum'

maiñ nisbat-e-mahbūb-e-ḳhudā maañg rahā huuñ

hanste hue marne ki du'a mang raha hun

bimar nabi ka hun dawa mang raha hun

ab shahr mein pur-kaif faza mang raha hun

gesu-e-mu’ambar ki hawa mang raha hun

ai baad-e-saba KHak-e-madina hi uTha la

be-nur nigahon ki ziya mang raha hun

ek bar bhi taiba ki ziyarat ho mayassar

sarkar ki sarkar mein kya mang raha hun

jannat ki talab hai na KHazane ki tamanna

ek nazr-e-karam roz-e-jaza mang raha hun

gulzar-e-madina ki taraf aankh jhuka kar

bulbul se chahakne ki ada mang raha hun

sab jud-o-karam mangen KHuda se 'shamim-anjum'

main nisbat-e-mahbub-e-KHuda mang raha hun