jis din se pa-e-nisbat rakkha teri gali mein

jis din se pā-e-nisbat rakkhā tirī galī meñ

dekhā phir ahl-e-dil ne kyā kyā tirī galī meñ

jab bhī kiyā hai maiñ ne sajda tirī galī meñ

ḳhud khich ke aa gayā hai ka.aba tirī galī meñ

aatā nahīñ hai tab tak dil ko qarār mere

lagtā nahīñ hai jab tak pherā tirī galī meñ

terī galī ko pā kar jaise tujhī ko paayā

mahsūs ho rahā hai aisā tirī galī meñ

taqvā adab qanā.at ḳhauf-e-ḳhudā itā.at

biktā hai āḳhirat kā saudā tirī galī meñ

qaa.il na the jo kal tak afsūn-e-dilbarī ke

phirte haiñ aaj ban kar shaidā tirī galī meñ

auroñ ko hoñ mubārak rangīniyāñ jahāñ kī

ham ne to jo bhī dekhā dekhā tirī galī meñ

tū aur terā jalva maiñ aur merī hairat

gum-sum khaḌā huā huuñ tanhā tirī galī meñ

taskīn-e-dil kī ḳhātir kyā kyā na maiñ bhaTaktā

vo to mirā muqaddar laayā tirī galī meñ

shāh-o-gadā ne paa.ī ḳhairāt dar se tere

ḳhālī rahā hai dāman kis kā tirī galī meñ

terā karam sadā.eñ detā hai āsiyoñ ko

bahtā hai rahmatoñ kā dariyā tirī galī meñ

qismat hai apnī apnī paate haiñ paane vaale

baTtā hai panj-tan kā sadqa tirī galī meñ

ghūme phire jahāñ meñ dar-dar kī ḳhaak chhānī

ab to lagā liyā hai Derā tirī galī meñ

jaane ye har-sū kis ne ā.īne rakh diye haiñ

har ruḳh se uTh rahā hai parda tirī galī meñ

ḳhud us ke muñh kī rangat kahtī hai rāz-e-niyyat

chhuptā nahīñ kisī kā chehra tirī galī meñ

vo kis kā ho sakā hai vo kis kā ho sakegā

jo ho sakā na dil se terā tirī galī meñ

ab sirf tū rahegā apnī galī kī raunaq

aa.egā ab na koī tujh sā tirī galī meñ

baiThā huā huuñ ab tak le kar tirā sahārā

tujh-bin nahīñ hai koī merā tirī galī meñ

pūchh us ke dil se jā kar kyā us ke dil pe guzrī

jo ik jhalak ko terī tarsā tirī galī meñ

dil haiñ ki luT rahe haiñ sar haiñ ki jhuk rahe haiñ

aalam hai be-ḳhudī kā kaisā tirī galī meñ

qaa.em hai aaj tak bhī vo rang-e-dars terā

milnā sikhā rahā hai mela tirī galī meñ

ho jaa.e chashm-e-rahmat ab to 'nasīr' par bhī

kab se paḌā huā hai aaqā tirī galī meñ

jis din se pa-e-nisbat rakkha teri gali mein

dekha phir ahl-e-dil ne kya kya teri gali mein

jab bhi kiya hai main ne sajda teri gali mein

KHud khich ke aa gaya hai kaba teri gali mein

aata nahin hai tab tak dil ko qarar mere

lagta nahin hai jab tak phera teri gali mein

teri gali ko pa kar jaise tujhi ko paya

mahsus ho raha hai aisa teri gali mein

taqwa adab qanaat KHauf-e-KHuda itaat

bikta hai aaKHirat ka sauda teri gali mein

qail na the jo kal tak afsun-e-dilbari ke

phirte hain aaj ban kar shaida teri gali mein

auron ko hon mubarak ranginiyan jahan ki

hum ne to jo bhi dekha dekha teri gali mein

tu aur tera jalwa main aur meri hairat

gum-sum khaDa hua hun tanha teri gali mein

taskin-e-dil ki KHatir kya kya na main bhaTakta

wo to mera muqaddar laya teri gali mein

shah-o-gada ne pai KHairaat dar se tere

KHali raha hai daman kis ka teri gali mein

tera karam sadaen deta hai aasiyon ko

bahta hai rahmaton ka dariya teri gali mein

qismat hai apni apni pate hain pane wale

baTta hai panj-tan ka sadqa teri gali mein

ghume phire jahan mein dar-dar ki KHak chhani

ab to laga liya hai Dera teri gali mein

jaane ye har-su kis ne aaine rakh diye hain

har ruKH se uTh raha hai parda teri gali mein

KHud us ke munh ki rangat kahti hai raaz-e-niyyat

chhupta nahin kisi ka chehra teri gali mein

wo kis ka ho saka hai wo kis ka ho sakega

jo ho saka na dil se tera teri gali mein

ab sirf tu rahega apni gali ki raunaq

aaega ab na koi tujh sa teri gali mein

baiTha hua hun ab tak le kar tera sahaara

tujh-bin nahin hai koi mera teri gali mein

puchh us ke dil se ja kar kya us ke dil pe guzri

jo ek jhalak ko teri tarsa teri gali mein

dil hain ki luT rahe hain sar hain ki jhuk rahe hain

aalam hai be-KHudi ka kaisa teri gali mein

qaem hai aaj tak bhi wo rang-e-dars tera

milna sikha raha hai mela teri gali mein

ho jae chashm-e-rahmat ab to 'nasir' par bhi

kab se paDa hua hai aaqa teri gali mein