jis ko hasil hain gham-e-saqi-e-kausar ke maze

jis ko hāsil haiñ ġham-e-sāqī-e-kausar ke maze

us kī taqdīr meñ haiñ rahmat-e-dāvar ke maze

kisī nazzāre kā lutf us ko na manzar ke maze

jis kī nazroñ ko mile us ruḳh-e-anvar ke maze

dekhtā rahtā hai har dam tire māthe kī shikan

aa.ina luuT rahā hai tire tevar ke maze

aa.ī gardish meñ kuchh is shaan se chashm-e-rahmat

mai-kada bhuul gayā bāda-o-sāġhar ke maze

girte paḌte dar-e-sarkār tak aa pahuñchā hai

ham se pūchhe koī ik tā.ir-e-be-par ke maze

un kī zulfoñ se jo mil jaa.e mahaktī ḳhairāt

bhuul jaa.e ye sabā bū-e-gul-e-tar ke maze

us ko phir aur koī martaba darkār nahīñ

jis kī qismat meñ likhe jaa.eñ tire dar ke maze

kyā kaheñ rāh-e-madīna hai muqaddas kitnī

bhūlte hī nahīñ us jāda-e-at.har ke maze

un kī manzil bhī madīna hai vatan bhī hai yahī

haiñ yahāñ āl-e-mohammad ke liye ghar ke maze

sajda-e-shauq kā armān idhar le pahuñchā

un ke dar par haiñ 'nasīr' ab to mire sar ke maze

jis ko hasil hain gham-e-saqi-e-kausar ke maze

us ki taqdir mein hain rahmat-e-dawar ke maze

kisi nazzare ka lutf us ko na manzar ke maze

jis ki nazron ko mile us ruKH-e-anwar ke maze

dekhta rahta hai har dam tere mathe ki shikan

aaina luT raha hai tere tewar ke maze

aai gardish mein kuchh is shan se chashm-e-rahmat

mai-kada bhul gaya baada-o-saghar ke maze

girte paDte dar-e-sarkar tak aa pahuncha hai

hum se puchhe koi ek tair-e-be-par ke maze

un ki zulfon se jo mil jae mahakti KHairaat

bhul jae ye saba bu-e-gul-e-tar ke maze

us ko phir aur koi martaba darkar nahin

jis ki qismat mein likhe jaen tere dar ke maze

kya kahen rah-e-madina hai muqaddas kitni

bhulte hi nahin us jada-e-athar ke maze

un ki manzil bhi madina hai watan bhi hai yahi

hain yahan aal-e-mohammad ke liye ghar ke maze

sajda-e-shauq ka arman idhar le pahuncha

un ke dar par hain 'nasir' ab to mere sar ke maze