kyunkar na ho momin ko tamanna-e-madina

kyūñkar na ho momin ko tamannā-e-madīna

haiñ mālik-e-jannat chaman-ārā-e-madīna

tanvīr se māmūr hai har zarra-e-yasrib

dekho to sahī raunaq-e-sahrā-e-madīna

maddāh rahā aap kā har kāfir-o-momin

majmūa-e-aḳhlāq the maulā-e-madīna

afsurda diloñ par nazar-e-faiz-o-atā ho

ai bahr-e-karam ai chaman-arā-e-madīna

taqdīr chamak jā.egī yasrib kī fazā meñ

hai nūr-fazā shiddat-e-saudā-e-madīna

rauze kī ziyārat se sharaf pā.eñge zaa.er

khīñche liye jaatī hai tamnā-e-madīna

sar-chashma-e-tauhīd hai ye shahr-e-muqaddas

yaktā nazar aa.ī hameñ duniyā-e-madīna

fiqra hai chaman meñ ye anādil kī zabāñ par

har phuul se ḳhush-rang haiñ gulhā-e-madīna

jitnā bhī baḌhūñ shauq-e-liqā aur sivā ho

hai rāhat-e-dil josh-e-tamannā-e-madīna

is raah meñ darkār hai iḳhlās-o-aqīdat

gulshan nazar aaya hameñ sahrā-e-madīna

ho nok-e-qalam saf.ha-e-kāġhaz pe gul-afshāñ

maqsūd hai mad.h-e-chaman-ārā-e-madīna

paayā laqab ai 'dil' ye faqat hubb-e-nabī meñ

kahte haiñ farishte mujhe shaidā-e-madīna

kyunkar na ho momin ko tamanna-e-madina

hain malik-e-jannat chaman-ara-e-madina

tanwir se mamur hai har zarra-e-yasrib

dekho to sahi raunaq-e-sahra-e-madina

maddah raha aap ka har kafir-o-momin

majmua-e-aKHlaq the maula-e-madina

afsurda dilon par nazar-e-faiz-o-ata ho

ai bahr-e-karam ai chaman-ara-e-madina

taqdir chamak jaegi yasrib ki faza mein

hai nur-faza shiddat-e-sauda-e-madina

rauze ki ziyarat se sharaf paenge zaer

khinche liye jati hai tamna-e-madina

sar-chashma-e-tauhid hai ye shahr-e-muqaddas

yakta nazar aai hamein duniya-e-madina

fiqra hai chaman mein ye anadil ki zaban par

har phul se KHush-rang hain gulha-e-madina

jitna bhi baDhun shauq-e-liqa aur siwa ho

hai rahat-e-dil josh-e-tamanna-e-madina

is rah mein darkar hai iKHlas-o-aqidat

gulshan nazar aaya hamein sahra-e-madina

ho nok-e-qalam safha-e-kaghaz pe gul-afshan

maqsud hai madh-e-chaman-ara-e-madina

paya laqab ai 'dil' ye faqat hubb-e-nabi mein

kahte hain farishte mujhe shaida-e-madina