maine huzur se jo huzuri ki chah ki

maiñ ne huzūr se jo huzūrī kī chaah kī

chhiḌkī haiñ mujh pe raushniyāñ jalva-gāh kī

jab mere ghar ke sahn meñ dhūpoñ ne raah kī

oḌhī hai maiñ ne chhāñv rasūl-e-ilāh kī

ab hādsāt-e-arz-o-samā aa.eñ kyā majāl

ab maiñ panāh meñ huuñ do-'ālam-panāh kī

āñkhoñ ke pattharoñ se chhalakne lagā hai nuur

mujh kam-nigāh par jo nabī ne nigāh kī

jab se huuñ bārgāh-e-risālat meñ bāryāb

duniyā ko justujū hai mirī bārgāh kī

'arsh-e-barīñ se aa.e haiñ sall-e-'alā ke phuul

'azmat ye farsh par hai rasūloñ ke shaah kī

chāheñ to shab-zadoñ ko sahar se navāz deñ

mālik hai un kī zaat safed-o-siyāh kī

kaise karam ho un pe rasūl-e-karīm kā

jo bo rahe haiñ ruuh meñ beleñ gunāh kī

me'mār-e-dīñ ke sāmne kis kis kā naam luuñ

kis ne na qasr-e-dīñ kī 'imārat tabāh kī

aise meñ ḳhair kījiye ḳhair-ul-varā haiñ aap

yūrish dayār-e-haq pe hai bātil sipāh kī

dekhā hai aa.ina to ye hairat huī mujhe

maiñ aur bārgāh risālat-panāh kī

maiñ to siyāhkār huuñ vo nūr-e-kibriyā

maiñ aur bārgāh risālat-panāh kī

allāh kā payām na jibrīl kā salām

taḌpā rahī hai yaad habīb-e-ilāh kī

rakh dūñgā naa't dāvar-e-mahshar ke sāmne

'zauqī' jo pesh aa.ī zarūrat gavāh kī

main ne huzur se jo huzuri ki chah ki

chhiDki hain mujh pe raushniyan jalwa-gah ki

jab mere ghar ke sahn mein dhupon ne rah ki

oDhi hai main ne chhanw rasul-e-ilah ki

ab hadsat-e-arz-o-sama aaen kya majal

ab main panah mein hun do-'alam-panah ki

aankhon ke pattharon se chhalakne laga hai nur

mujh kam-nigah par jo nabi ne nigah ki

jab se hun bargah-e-risalat mein baryab

duniya ko justuju hai meri bargah ki

'arsh-e-barin se aae hain sall-e-'ala ke phul

'azmat ye farsh par hai rasulon ke shah ki

chahen to shab-zadon ko sahar se nawaz den

malik hai un ki zat safed-o-siyah ki

kaise karam ho un pe rasul-e-karim ka

jo bo rahe hain ruh mein belen gunah ki

me'mar-e-din ke samne kis kis ka nam lun

kis ne na qasr-e-din ki 'imarat tabah ki

aise mein KHair kijiye KHair-ul-wara hain aap

yurish dayar-e-haq pe hai baatil sipah ki

dekha hai aaina to ye hairat hui mujhe

main aur bargah risalat-panah ki

main to siyahkar hun wo nur-e-kibriya

main aur bargah risalat-panah ki

allah ka payam na jibril ka salam

taDpa rahi hai yaad habib-e-ilah ki

rakh dunga na't dawar-e-mahshar ke samne

'zauqi' jo pesh aai zarurat gawah ki