mere rasul ki nisbat tujhe ujalon se

mire rasūl ki nisbat tujhe ujāloñ se

maiñ terā zikr karūñ sub.h ke havāloñ se

na merī naa't kī muhtāj zaat hai terī

na terī mad.h hai mumkin mire ḳhayāloñ se

tū raushnī kā payambar hai aur mirī tārīḳh

bharī paḌī hai shab-e-zulm kī misāloñ se

tirā payām-e-mohabbat thā aur mere yahāñ

dil-o-dimāġh haiñ pur nafratoñ ke jāloñ se

ye iftiḳhār hai terā ki mere ‘arsh-maqām

tū ham-kalām rahā hai zamīn vāloñ se

magar ye muftī-o-vā.iz ye mohtasib ye faqīh

jo mo'tabar haiñ faqat maslahat kī chāloñ se

ḳhudā ke naam ko becheñ magar ḳhudā na kare

asar-pazīr hoñ ḳhalq-e-ḳhudā ke nāloñ se

na merī aañkh meñ kājal na mushkbū hai libās

ki mere dil kā hai rishta ḳharāb-hāloñ se

hai tursh-rū mirī bātoñ se sāhib-e-mimbar

ḳhatīb-e-shahr hai barham mire savāloñ se

mire zamīr ne qābīl ko nahīñ baḳhshā

maiñ kaise sulh karūñ qatl karne vāloñ se

maiñ be-bisāt sā shā'ir huuñ par karam terā

ki bā-sharaf huuñ qabā-o-kulāh vāloñ se

mere rasul ki nisbat tujhe ujalon se

main tera zikr karun subh ke hawalon se

na meri na't ki muhtaj zat hai teri

na teri madh hai mumkin mere KHayalon se

tu raushni ka payambar hai aur meri tariKH

bhari paDi hai shab-e-zulm ki misalon se

tera payam-e-mohabbat tha aur mere yahan

dil-o-dimagh hain pur nafraton ke jalon se

ye iftiKHar hai tera ki mere ‘arsh-maqam

tu ham-kalam raha hai zamin walon se

magar ye mufti-o-waiz ye mohtasib ye faqih

jo mo'tabar hain faqat maslahat ki chaalon se

KHuda ke nam ko bechen magar KHuda na kare

asar-pazir hon KHalq-e-KHuda ke nalon se

na meri aankh mein kajal na mushkbu hai libas

ki mere dil ka hai rishta KHarab-haalon se

hai tursh-ru meri baaton se sahib-e-mimbar

KHatib-e-shahr hai barham mere sawalon se

mere zamir ne qabil ko nahin baKHsha

main kaise sulh karun qatl karne walon se

main be-bisat sa sha'ir hun par karam tera

ki ba-sharaf hun qaba-o-kulah walon se