saqi ho ata saghar-e-sahba-e-madina

saaqī ho 'atā sāġhar-e-sahbā-e-madīna

pyāsī hai mirī rūh-e-tamannā-e-madīna

bahlā.eñge vā'iz na mujhe ḳhvāb jināñ ke

sar meñ hai samāyā mire saudā-e-madīna

pal bhar meñ shifā dete haiñ jo jāñ-ba-laboñ ko

ai chāragaro vo haiñ masīhā-e-madīna

dil rahguzar-e-zulmat-e-duniyā na banegā

raushan ho agar sham'-e-tamannā-e-madīna

jannat kā tujhe rāsta maiñ sīdhā batā.ūñ

zāhid ho dil-o-jān se shaidā-e-madīna

yā-rab ye mire jazba-e-sādiq meñ asar ho

āñkheñ jo karūñ band nazar aa.e madīna

har gosha-e-duniyā meñ haiñ tāroñ kī tarah ham

'aḳhtar' hai yahī jalva-e-zebā-e-madīna

saqi ho 'ata saghar-e-sahba-e-madina

pyasi hai meri ruh-e-tamanna-e-madina

bahlaenge wa'iz na mujhe KHwab jinan ke

sar mein hai samaya mere sauda-e-madina

pal bhar mein shifa dete hain jo jaan-ba-labon ko

ai chaaragaro wo hain masiha-e-madina

dil rahguzar-e-zulmat-e-duniya na banega

raushan ho agar sham'-e-tamanna-e-madina

jannat ka tujhe rasta main sidha bataun

zahid ho dil-o-jaan se shaida-e-madina

ya-rab ye mere jazba-e-sadiq mein asar ho

aankhen jo karun band nazar aae madina

har gosha-e-duniya mein hain taron ki tarah hum

'aKHtar' hai yahi jalwa-e-zeba-e-madina