thi jis ke muqaddar mein gadai tere dar ki

thī jis ke muqaddar meñ gadā.ī tire dar kī

qudrat ne use raah dikhā.ī tire dar kī

har vaqt hai ab jalva-numā.ī tire dar kī

tasvīr hī dil meñ utar aa.ī tire dar kī

haiñ arz-o-samāvāt tirī zaat kā sadqa

muhtāj hai ye saarī ḳhudā.ī tire dar kī

anvār hī anvār kā aalam nazar aaya

chilman jo zarā maiñ ne uThā.ī tire dar kī

mashrab hai mirā terī talab terā tasavvur

maslak hai mirā sirf gadā.ī tire dar kī

dar se tire allāh kā dar ham ko milā hai

is auj kā baa.is hai rasā.ī tire dar kī

ik ne.amat-e-uzmā se vo mahrūm rahā hai

jis shaḳhs ne ḳhairāt na paa.ī tire dar kī

maiñ bhuul gayā naqsh-o-nigār-e-ruḳh-e-duniyā

sūrat jo mire sāmne aa.ī tire dar kī

tā-zīst tire dar se mirā sar na uThegā

mar jā.ūñ to mumkin hai judā.ī tire dar kī

phir us ne koī aur tasavvur nahīñ bāñdhā

ham ne jise tasvīr dikhā.ī tire dar kī

hai mere liye to yahī me.arāj-e-ibādat

hāsil hai mujhe nāsiya-sā.ī tire dar kī

aaya hai 'nasīr' aaj tamanna yahī le kar

palkoñ se kiye jaa.e safā.ī tire dar kī

thi jis ke muqaddar mein gadai tere dar ki

qudrat ne use rah dikhai tere dar ki

har waqt hai ab jalwa-numai tere dar ki

taswir hi dil mein utar aai tere dar ki

hain arz-o-samawat teri zat ka sadqa

muhtaj hai ye sari KHudai tere dar ki

anwar hi anwar ka aalam nazar aaya

chilman jo zara main ne uThai tere dar ki

mashrab hai mera teri talab tera tasawwur

maslak hai mera sirf gadai tere dar ki

dar se tere allah ka dar hum ko mila hai

is auj ka bais hai rasai tere dar ki

ek neamat-e-uzma se wo mahrum raha hai

jis shaKHs ne KHairaat na pai tere dar ki

main bhul gaya naqsh-o-nigar-e-ruKH-e-duniya

surat jo mere samne aai tere dar ki

ta-zist tere dar se mera sar na uThega

mar jaun to mumkin hai judai tere dar ki

phir us ne koi aur tasawwur nahin bandha

hum ne jise taswir dikhai tere dar ki

hai mere liye to yahi mearaj-e-ibaadat

hasil hai mujhe nasiya-sai tere dar ki

aaya hai 'nasir' aaj tamanna yahi le kar

palkon se kiye jae safai tere dar ki