tire huzūr meñ sajde guzārtā huuñ maiñ
isī tarah se muqaddar sañvārtā huuñ maiñ
tujhe ḳhabar hai tujhe 'ilm hai tujhe mā'lūm
har ek haal meñ tujh ko pukārtā huuñ maiñ
bichhī huī hai isī tarh se bisāt-e-alam
na jīt.tā huuñ maiñ baazī na hārtā huuñ maiñ
tirā karam hai ki maiñ ḳhud huuñ nā-ḳhudā apnā
jo ġharq hotī hai kashtī ubhārtā huuñ maiñ
tū hī ‘alīm hai tū hī ḳhabīr-o-qādir-e-kul
tujhe ḳhabar hai ki dil kis pe vārtā huuñ maiñ
nahīñ hai tujh pe bharosa to aur ye kyā hai
ki do-jahān ko Thokar pe mārtā huuñ maiñ
bahā rahā huuñ jo aañsū ye pai-ba-pai 'bahzād'
kisī ke naam ke sadqe utārtā huuñ maiñ
tere huzur mein sajde guzarta hun main
isi tarah se muqaddar sanwarta hun main
tujhe KHabar hai tujhe 'ilm hai tujhe ma'lum
har ek haal mein tujh ko pukarta hun main
bichhi hui hai isi tarh se bisat-e-alam
na jitta hun main bazi na haarta hun main
tera karam hai ki main KHud hun na-KHuda apna
jo gharq hoti hai kashti ubhaarta hun main
tu hi ‘alim hai tu hi KHabir-o-qadir-e-kul
tujhe KHabar hai ki dil kis pe warta hun main
nahin hai tujh pe bharosa to aur ye kya hai
ki do-jahan ko Thokar pe marta hun main
baha raha hun jo aansu ye pai-ba-pai 'bahzad'
kisi ke nam ke sadqe utarta hun main
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.