tu jo ai mah-e-arab aalam ki zinat ho gaya

tū jo ai māh-e-'arab 'ālam kī zīnat ho gayā

nuur terā kis ke jalve kī bashārat ho gayā

nuur terā dāfe'-e-āsār-e-zulmat ho gayā

ek 'ālam ke liye sham'-e-hidāyat ho gayā

ġham tirā aayā hai dil meñ 'aish kā sāmāñ liye

duur kulfat ho ga.ī andoh ruḳhsat ho gayā

bichh ga.ī hai chādar-e-ḳhār-e-muġhīlāñ dasht meñ

tere vahshī ke liye sāmān-e-rahmat ho gayā

sāda-dil 'āshiq ki thā mushtāq terī diid kā

dekh kar ā.īna-e-dil mahv-e-hairat ho gayā

kyoñ na manzūr-e-nazar ho tere kūche kā ġhubār

'ain ye to surma-e-chashm-e-basīrat ho gayā

rū-e-anvar kā tasavvur vaj.h-e-ḳhāmoshī huā

ik parī kā jalva thā dīvāna 'vahshat' ho gayā

tu jo ai mah-e-'arab 'alam ki zinat ho gaya

nur tera kis ke jalwe ki bashaarat ho gaya

nur tera dafe'-e-asar-e-zulmat ho gaya

ek 'alam ke liye sham'-e-hidayat ho gaya

gham tera aaya hai dil mein 'aish ka saman liye

dur kulfat ho gai andoh ruKHsat ho gaya

bichh gai hai chadar-e-KHar-e-mughilan dasht mein

tere wahshi ke liye saman-e-rahmat ho gaya

sada-dil 'ashiq ki tha mushtaq teri did ka

dekh kar aaina-e-dil mahw-e-hairat ho gaya

kyon na manzur-e-nazar ho tere kuche ka ghubar

'ain ye to surma-e-chashm-e-basirat ho gaya

ru-e-anwar ka tasawwur wajh-e-KHamoshi hua

ek pari ka jalwa tha diwana 'wahshat' ho gaya