zindagi mujh par to main bhi zist par nazan hua

zindagī mujh par to maiñ bhī ziist par nāzāñ huā

mashġhala jab se mirā mad.h-e-shah-e-zīshāñ huā

'aks-e-husn-e-zāt se ye sab sar-o-sāmāñ huā

jalva-zār-e-zindagī ā.īna-e-hairāñ huā

'ishq-e-ahmad dāstān-e-zīst kā 'unvāñ huā

kis qadar achchhā ‘ilāj-e-gardish-e-daurāñ huā

kū-e-ahmad kā tasavvur le ke maiñ jab chal paḌā

rāste kā gosha gosha ā.ina-sāmāñ huā

mohsin-e-insāniyat ai hādī-e-nau'-e-bashar

tere faizān-e-nazar se aadmī insāñ huā

zikr-e-ahmad se mujhe har ranj meñ rāhat milī

ism-e-ahmad se mire har dard kā darmāñ huā

aap kā daur-e-sa'ādat kyā mubārak daur thā

qadr-dāñ us daur meñ insān kā insāñ huā

ye zamīñ ye āsmāñ tasnīm-o-kausar salsabīl

sab kuchh us kā hai jo terā tābe’-e-farmāñ huā

ai ta'ālallah tirī tā'līm insāñ-dostī

faiz se tere gadā bhī ham-sar-e-sultāñ huā

hai musalsal nā’t-goī kā 'jamālī' ye sila

naam terā bhī sanā-ḳhvān-e-shah-e-zīshāñ huā

zindagi mujh par to main bhi zist par nazan hua

mashghala jab se mera madh-e-shah-e-zishan hua

'aks-e-husn-e-zat se ye sab sar-o-saman hua

jalwa-zar-e-zindagi aaina-e-hairan hua

'ishq-e-ahmad dastan-e-zist ka 'unwan hua

kis qadar achchha ‘ilaj-e-gardish-e-dauran hua

ku-e-ahmad ka tasawwur le ke main jab chal paDa

raste ka gosha gosha aaina-saman hua

mohsin-e-insaniyat ai hadi-e-nau'-e-bashar

tere faizan-e-nazar se aadmi insan hua

zikr-e-ahmad se mujhe har ranj mein rahat mili

ism-e-ahmad se mere har dard ka darman hua

aap ka daur-e-sa'adat kya mubarak daur tha

qadr-dan us daur mein insan ka insan hua

ye zamin ye aasman tasnim-o-kausar salsabil

sab kuchh us ka hai jo tera tabe’-e-farman hua

ai ta'alallah teri ta'lim insan-dosti

faiz se tere gada bhi ham-sar-e-sultan hua

hai musalsal na’t-goi ka 'jamali' ye sila

nam tera bhi sana-KHwan-e-shah-e-zishan hua