ghaalib-e-KHush-nawa!

mere chāroñ taraf ek sailāb hai

jis meñ har chiiz miTne ko be-tāb hai

par mirī ruuh kā dasht be-āb hai

ye fanā

ye musalsal fanā ye 'adam kā safar

maut kī rah-guzar

al-hazar! al-hazar!

ranj-ḳhūgar hue par bhī ranj-e-girāñ

darpai-e-jān hai

dasht-e-imkān kī vus'ateñ dekh kar

aañkh hairān hai

mudda'ā ke liye shā'irī aaj bhī

sehr-e-be-jān hai

ḳhāmushī saut hai gung idrāk hai

be-asar har fuġhāñ be-rafū chaak hai

us ziyāñ-ḳhez bastī meñ 'arz-e-hunar

aaj bhī ḳhaak hai

ḳhū-e-taslīm bhī rā.egāñ hī ga.ī

yā'nī ham-bazmī-e-ḳhush-qadāñ hī ga.ī

husn be-rang hai

'ishq ilzām hai

har 'amal ḳhaam hai

har qadam par nayā shahr-e-auhām hai

ġhālib-e-ḳhush-navā! mujh ko rasta dikhā

manzil-e-she'r kī

raah par maiñ bhī huuñ

dekh muḌ ke

tirā ham-safar maiñ bhī huuñ

mere chaaron taraf ek sailab hai

jis mein har chiz miTne ko be-tab hai

par meri ruh ka dasht be-ab hai

ye fana

ye musalsal fana ye 'adam ka safar

maut ki rah-guzar

al-hazar! al-hazar!

ranj-KHugar hue par bhi ranj-e-giran

darpai-e-jaan hai

dasht-e-imkan ki wus'aten dekh kar

aankh hairan hai

mudda'a ke liye sha'iri aaj bhi

sehr-e-be-jaan hai

KHamushi saut hai gung idrak hai

be-asar har fughan be-rafu chaak hai

us ziyan-KHez basti mein 'arz-e-hunar

aaj bhi KHak hai

KHu-e-taslim bhi raegan hi gai

ya'ni ham-bazmi-e-KHush-qadan hi gai

husn be-rang hai

'ishq ilzam hai

har 'amal KHam hai

har qadam par naya shahr-e-auham hai

ghaalib-e-KHush-nawa! mujh ko rasta dikha

manzil-e-she'r ki

rah par main bhi hun

dekh muD ke

tera ham-safar main bhi hun