wahy

'ajīb mausam thā vo bhī jabki

'ibādateñ kor chashm thiiñ

aur 'aqīdateñ apnī saarī bīnā.ī kho chukī thiiñ

ḳhud apne hāthoñ se tarāshe patthar ko devtā keh ke

ḳhair-o-barkat kī ne'mateñ log māñgte the

magar vo ik shaḳhs

jo abhī apne aap par bhī na munkashif thā

'ajīb uljhan meñ mubtalā thā

ye vo nahīñ haiñ vo kaun hogā kā karb-e-be-nām chakh rahā thā

so apne un nā-rasā dukhoñ kī salīb uThā.e

ġhamoñ kī nāyāft shahriyat ko talāsh karte

vo shahr-e-āzar se duur

apne tamām lamhe

hirā ke ġhāroñ ke ḳhvāb-āsā sukūt ko sauñpne lagā thā

ye soch kā e'tikāf bhī thā

aur ek an-dekhī rūh-e-kul ke vujūd kā e'tirāf bhī thā

vo raat bhī irtikāz kī ek raat thī

jab ki lamha bhar ko

fazā meñ sannāTā chhā gayā

aur havāoñ kī saañs ruk ga.ī thī

sitāra-e-shab ke dil kī dhaḌkan Thahar ga.ī thī

gurez-pā sā'ateñ tahayyur-zada thiiñ

jaise vujūd kī nabz tham ga.ī ho

yakāyak ik raushnī jamāl-o-jalāl ke saare rang le kar

fazā meñ gūñjī

paḌho

maiñ paḌh nahīñ sakūñgā

paḌho

maiñ paḌh nahīñ sakūñgā

paḌho

magar maiñ kyā paḌhūñ

paḌho tum apne 'azīm parvardigār kā naam le ke

jo sab ko ḳhalq kartā hai

jis ne insān ko banāyā hai munjamid ḳhuun se

paḌho ki tumhārā parvardigār be-had karīm hai

aur jis ne tum ko qalam se tā'līm dī

usī ne batā.īñ insān ko vo bāteñ

ki jin ko vo jāntā nahīñ thā

fazā-e-be-nutq jaise iqrā kā vird karne lagī thī

vo saare lafz jo

tīrgī ke sailāb meñ kahīñ bah chuke the

phir raushnī kī lahroñ meñ

vāpsī ke safar kā āġhāz kar rahe the

darīcha-e-be-ḳhayāl meñ

āgahī ke sūraj utar rahe the

us ek pal meñ

vo merā ummī

madīnatul'ilm ban chukā thā

'ajib mausam tha wo bhi jabki

'ibaadaten kor chashm thin

aur 'aqidaten apni sari binai kho chuki thin

KHud apne hathon se tarashe patthar ko dewta keh ke

KHair-o-barkat ki ne'maten log mangte the

magar wo ek shaKHs

jo abhi apne aap par bhi na munkashif tha

'ajib uljhan mein mubtala tha

ye wo nahin hain wo kaun hoga ka karb-e-be-nam chakh raha tha

so apne un na-rasa dukhon ki salib uThae

ghamon ki nayaft shahriyat ko talash karte

wo shahr-e-azar se dur

apne tamam lamhe

hira ke ghaaron ke KHwab-asa sukut ko saunpne laga tha

ye soch ka e'tikaf bhi tha

aur ek an-dekhi ruh-e-kul ke wujud ka e'tiraf bhi tha

wo raat bhi irtikaz ki ek raat thi

jab ki lamha bhar ko

faza mein sannaTa chha gaya

aur hawaon ki sans ruk gai thi

sitara-e-shab ke dil ki dhaDkan Thahar gai thi

gurez-pa sa'aten tahayyur-zada thin

jaise wujud ki nabz tham gai ho

yakayak ek raushni jamal-o-jalal ke sare rang le kar

faza mein gunji

paDho

main paDh nahin sakunga

paDho

main paDh nahin sakunga

paDho

magar main kya paDhun

paDho tum apne 'azim parwardigar ka nam le ke

jo sab ko KHalq karta hai

jis ne insan ko banaya hai munjamid KHun se

paDho ki tumhaara parwardigar be-had karim hai

aur jis ne tum ko qalam se ta'lim di

usi ne batain insan ko wo baaten

ki jin ko wo jaanta nahin tha

faza-e-be-nutq jaise iqra ka wird karne lagi thi

wo sare lafz jo

tirgi ke sailab mein kahin bah chuke the

phir raushni ki lahron mein

wapsi ke safar ka aaghaz kar rahe the

daricha-e-be-KHayal mein

aagahi ke suraj utar rahe the

us ek pal mein

wo mera ummi

madinatul'ilm ban chuka tha