shab-o-roz tamasha

zehn jab tak hai

ḳhayālāt kī zanjīr kahāñ kaTtī hai

hoñT jab tak haiñ

savālāt kī zanjīr kahāñ kaTtī hai

bahs karte raho likhte raho nazmeñ ġhazleñ

zehn par sadiyoñ se taarī hai jo majlis kī fazā

is ḳhunuk aañch se kyā pighlegī

soch lene hī se hālāt kī zanjīr kahāñ kaTtī hai

niiñd meñ Duubī huī āñkhoñ se vābasta ḳhvāb

tez kirnoñ kī sinānoñ pe hī rusvā sar-e-ām

ye shahīd apnī salīboñ se palaT aate haiñ dil meñ har shaam

sub.h hotī hai magar raat kī zanjīr kahāñ kaTtī hai

din guzar jaatā hai be-faiz kad-o-kāvish meñ

ek an-dekhe jahannam kī tab-o-tābish meñ

jism aur jaañ kī tag-o-tāz kī har pursish meñ

dard-o-ġham hasrat-o-mahrūmī kī har kāhish meñ

talab-o-tark-e-talab silsila-e-be-pāyāñ

marg hī ziist kā unvān hai har ḳhūn-shuda ḳhvāhish meñ

ġham se bhāgeñ bhī to faryād-o-shikāyāt kī zanjīr kahāñ kaTtī hai

vaqt vo daulat-e-nāyāb hai aatā nahīñ haath

ham mashīnoñ kī tarah jiite haiñ pābandi-e-auqāt ke saath

vaqt be-kār guzartā hī chalā jaatā hai

kursiyoñ mezoñ se be-ma.anī mulāqātoñ meñ

saiñkaḌoñ baar kī aglī huī dohrā.ī huī bātoñ meñ

mandgī rahne kī tamannā kī mudārātoñ meñ

shikam-o-jāñ kī ibādāt kī zanjīr kahāñ kaTtī hai

sub.h se shaam talak itne ḳhudā milte haiñ har kāfir ko

sajda-e-shukr se inkār kī mohlat nahīñ milne paatī

saiñkaḌoñ lākhoñ ḳhudāoñ kī nazar se chhup kar

ḳhud se mil lene kī ruḳhsat nahīñ milne paatī

ḳhud-parastoñ se bhī tā.āt kī zanjīr kahāñ kaTtī hai

raat aatī hai to dil kahtā hai ham apne haiñ

ḳhalvat-e-ḳhvāb meñ duniyā se kinārā kar leñ

kal bhī denā hai lahū apnā dil-o-dīda kī jholī bhar leñ

jism ke shor se aur ruuh kī fariyād se dam ghuTtā hai

din ke be-kār ḳhayālāt kī zanjīr kahāñ kaTtī hai

be-niyāzāna bhī jiinā hai faqat ek gumāñ

fikr-e-maujūd ko chhoḌeñ to ġham-e-nā-maujūd

saath har saañs ke hai silsila-e-hast-o-būd

ġham-e-āfāq ko Thukrā.eñ kareñ tark-e-jahāñ

phir bhī ye fikr ki jiine kā ho koī unvāñ

be-niyāzī se ġham-e-zāt kī zanjīr kahāñ kaTtī hai

zehn meñ andhe aqīdoñ kī siyāhī bhar lo

taaki is nagrī meñ

kabhī afkār ke sho.aloñ kā guzar ho na sake

jabr kā hukm suno

hoñToñ ko apne sī lo

taaki un rāhoñ se

kabhī lafzoñ kā safar ho na sake

zehn-o-lab phir bhī nahīñ chup hote

un ke ḳhāmosh savālāt kī

pech-dar-pech ḳhayālāt kī

zanjīr kahāñ kaTtī hai

zehn jab tak hai

KHayalat ki zanjir kahan kaTti hai

honT jab tak hain

sawalat ki zanjir kahan kaTti hai

bahs karte raho likhte raho nazmen ghazlen

zehn par sadiyon se tari hai jo majlis ki faza

is KHunuk aanch se kya pighlegi

soch lene hi se haalat ki zanjir kahan kaTti hai

nind mein Dubi hui aankhon se wabasta KHwab

tez kirnon ki sinanon pe hi ruswa sar-e-am

ye shahid apni salibon se palaT aate hain dil mein har sham

subh hoti hai magar raat ki zanjir kahan kaTti hai

din guzar jata hai be-faiz kad-o-kawish mein

ek an-dekhe jahannam ki tab-o-tabish mein

jism aur jaan ki tag-o-taz ki har pursish mein

dard-o-gham hasrat-o-mahrumi ki har kahish mein

talab-o-tark-e-talab silsila-e-be-payan

marg hi zist ka unwan hai har KHun-shuda KHwahish mein

gham se bhagen bhi to faryaad-o-shikayat ki zanjir kahan kaTti hai

waqt wo daulat-e-nayab hai aata nahin hath

hum mashinon ki tarah jite hain pabandi-e-auqat ke sath

waqt be-kar guzarta hi chala jata hai

kursiyon mezon se be-mani mulaqaton mein

sainkaDon bar ki agli hui dohrai hui baaton mein

mandgi rahne ki tamanna ki mudaraaton mein

shikam-o-jaan ki ibaadat ki zanjir kahan kaTti hai

subh se sham talak itne KHuda milte hain har kafir ko

sajda-e-shukr se inkar ki mohlat nahin milne pati

sainkaDon lakhon KHudaon ki nazar se chhup kar

KHud se mil lene ki ruKHsat nahin milne pati

KHud-paraston se bhi taat ki zanjir kahan kaTti hai

raat aati hai to dil kahta hai hum apne hain

KHalwat-e-KHwab mein duniya se kinara kar len

kal bhi dena hai lahu apna dil-o-dida ki jholi bhar len

jism ke shor se aur ruh ki fariyaad se dam ghuTta hai

din ke be-kar KHayalat ki zanjir kahan kaTti hai

be-niyazana bhi jina hai faqat ek guman

fikr-e-maujud ko chhoDen to gham-e-na-maujud

sath har sans ke hai silsila-e-hast-o-bud

gham-e-afaq ko Thukraen karen tark-e-jahan

phir bhi ye fikr ki jine ka ho koi unwan

be-niyazi se gham-e-zat ki zanjir kahan kaTti hai

zehn mein andhe aqidon ki siyahi bhar lo

taki is nagri mein

kabhi afkar ke shoalon ka guzar ho na sake

jabr ka hukm suno

honTon ko apne si lo

taki un rahon se

kabhi lafzon ka safar ho na sake

zehn-o-lab phir bhi nahin chup hote

un ke KHamosh sawalat ki

pech-dar-pech KHayalat ki

zanjir kahan kaTti hai