hum kahan aa gae

ham kahāñ aa ga.e

saare be-samt haiñ

qāfile kārvāñ sārbāñ

ek sailāb-e-ādam ravāñ chaar sū

ik tag-o-tāz-e-kār-e-jahāñ

āsmāñ se pare sair-e-sayyārgāñ

aur zamīñ-doz pahnā.iyoñ meñ

nigāhoñ kī hairāniyāñ

ab kahīñ bhī nahīñ

mātam-e-marg-e-be-chārgāñ

har adālat meñ insāf kī arziyāñ

bātiloñ kī tarafdāriyāñ

phir uThā le ga.e bānū-e-be-ridā

saare chup-chāp haiñ

koī pursāñ nahīñ

giryā-e-tifl-e-be-chārgāñ

koī suntā nahīñ

ḳhvāb bīmār āñkhoñ meñ marte hue

ḳhud-kushī chār-sū bain kartī huī

ye mirī arz-e-jannat-nishāñ

jo pukārī ga.ī

qibla-e-ārfāñ ma.abad-e-nūriyāñ

kūcha-e-dilbarāñ bastī-e-āshiqāñ

maqtal-e-harf-o-saut-o-sadā ban ga.ī

ab lahū-rañg haiñ saare tishna-labāñ

sādiq-o-sādiqa

nāz-bardār-e-āshuftagāñ

hum kahan aa gae

sare be-samt hain

qafile karwan sarban

ek sailab-e-adam rawan chaar su

ek tag-o-taz-e-kar-e-jahan

aasman se pare sair-e-sayyargan

aur zamin-doz pahnaiyon mein

nigahon ki hairaniyan

ab kahin bhi nahin

matam-e-marg-e-be-chaargan

har adalat mein insaf ki arziyan

baatilon ki tarafdariyan

phir uTha le gae banu-e-be-rida

sare chup-chap hain

koi pursan nahin

girya-e-tifl-e-be-chaargan

koi sunta nahin

KHwab bimar aankhon mein marte hue

KHud-kushi chaar-su bain karti hui

ye meri arz-e-jannat-nishan

jo pukari gai

qibla-e-arfan mabad-e-nuriyan

kucha-e-dilbaran basti-e-ashiqan

maqtal-e-harf-o-saut-o-sada ban gai

ab lahu-rang hain sare tishna-laban

sadiq-o-sadiqa

naz-bardar-e-ashuftagan