tujhe kya KHabar

tirī aarzū

jise maiñ ne sab se alag rakkhā

use dil ke narm ġhilāf se

kabhī jhāñkne bhī nahīñ diyā

ki ye ḳhvāhishoñ ke hujūm meñ

kahīñ apnī qadar gañvā na de

tirī chhoTī chhoTī nishāniyoñ ko

baḌe qarīne se poTlī meñ lapeT kar

kabhī koTharī meñ chhupā diyā

kabhī TaañD par rakhe degche meñ girā diyā

ki pare pare raheñ chashm-e-charḳh-e-kabūd se

kabhī zer-e-lab tirā naam bhī

kahīñ le liyā

to tamām shab usī vasvase meñ guzar ga.ī

ki ḳhamoshiyoñ meñ Dhalā huā ye surūd-e-ġham

kisī kam-shanās ne sun liyā

to na bach sakegā vaqār-e-hurmat

usī ehtiyāt meñ kaT ga.ī hai mirī hayāt kī dopahar

mire chāragar tujhe kyā ḳhabar

mujhe aaj bhī tirī laaj kā vahī pahle jaisā ḳhayāl hai

na to fikr-e-shām-e-firāq hai

na umīd-e-sub.h-e-visāl hai

teri aarzu

jise main ne sab se alag rakkha

use dil ke narm ghilaf se

kabhi jhankne bhi nahin diya

ki ye KHwahishon ke hujum mein

kahin apni qadar ganwa na de

teri chhoTi chhoTi nishaniyon ko

baDe qarine se poTli mein lapeT kar

kabhi koThari mein chhupa diya

kabhi TanD par rakhe degche mein gira diya

ki pare pare rahen chashm-e-charKH-e-kabud se

kabhi zer-e-lab tera nam bhi

kahin le liya

to tamam shab usi waswase mein guzar gai

ki KHamoshiyon mein Dhala hua ye surud-e-gham

kisi kam-shanas ne sun liya

to na bach sakega waqar-e-hurmat

usi ehtiyat mein kaT gai hai meri hayat ki dopahar

mere chaaragar tujhe kya KHabar

mujhe aaj bhi teri laj ka wahi pahle jaisa KHayal hai

na to fikr-e-sham-e-firaq hai

na umid-e-subh-e-visal hai