27 december

ufuq pe duur koī chāñd jagmagā uTThā

na.e libās meñ ik jism muskurā uTThā

chamak uThīñ haiñ na.e manzaroñ meñ kuchh shakleñ

sajī huī haiñ kuchh hoñToñ pe qahqahoñ kī safeñ

mahakte pairahnoñ ke hisār meñ koī

kisī kī narm hathelī meñ rang bhartā hai

havā.eñ ḳhushbueñ phailā rahī haiñ chāroñ taraf

bulandiyoñ pe ka.ī chāñd muskurāte haiñ

sabhī guzarte hue lamhe gungunāte haiñ

tamām rāste haiñ raushnī meñ Duube hue

yahāñ se duur magar ik maqām aisā hai

ki jahāñ

sukūn-e-shab kī asīrī meñ ek sūraj hai

jo tīrgī kī salāḳhoñ se sar Tikā.e hue

sabhī badalte hue manzaroñ pe hañstā hai

ufuq pe dur koi chand jagmaga uTTha

nae libas mein ek jism muskura uTTha

chamak uThin hain nae manzaron mein kuchh shaklen

saji hui hain kuchh honTon pe qahqahon ki safen

mahakte pairahnon ke hisar mein koi

kisi ki narm hatheli mein rang bharta hai

hawaen KHushbuen phaila rahi hain chaaron taraf

bulandiyon pe kai chand muskuraate hain

sabhi guzarte hue lamhe gungunate hain

tamam raste hain raushni mein Dube hue

yahan se dur magar ek maqam aisa hai

ki jahan

sukun-e-shab ki asiri mein ek suraj hai

jo tirgi ki salaKHon se sar Tikae hue

sabhi badalte hue manzaron pe hansta hai