ai ham-safaro kyun na yahin shahr basa len

ai ham-safaro kyuuñ na yahīñ shahr basā leñ

apne hī usuul apnī hī aqdār banā leñ

vo log jinhoñ ne mire hoñToñ ko siyā hai

sozan se mirī soch kā kāñTā bhī nikāleñ

is bazm se uTThegā na sho.ala koī hargiz

yaaro chalo qindīl se qindīl jalā leñ

har shahr meñ haiñ fasl-e-junūñ aane ke charche

shorīda-saro aao garebān silā leñ

yuuñ zehn pe hai ḳhauf ke sāyoñ kā tasallut

ham aa.ī huī baat ko hoñToñ meñ dabā leñ

kahne ko to bāzār meñ ham-jins garāñ haiñ

amalan hamīñ kauḌī pe ḳharīdār uThā leñ

bojh apnā bhī ham se to uThāyā nahīñ jaatā

aur aap musir aap kā bhī bojh uThā leñ

shāyad koī chiñgārī sulagtī huī mil jaa.e

aao to zarā raakh kā ye Dher khañgāleñ

ai ham-safaro kyun na yahin shahr basa len

apne hi usul apni hi aqdar bana len

wo log jinhon ne mere honTon ko siya hai

sozan se meri soch ka kanTa bhi nikalen

is bazm se uTThega na shoala koi hargiz

yaro chalo qindil se qindil jala len

har shahr mein hain fasl-e-junun aane ke charche

shorida-saro aao gareban sila len

yun zehn pe hai KHauf ke sayon ka tasallut

hum aai hui baat ko honTon mein daba len

kahne ko to bazar mein ham-jins garan hain

amalan hamin kauDi pe KHaridar uTha len

bojh apna bhi hum se to uThaya nahin jata

aur aap musir aap ka bhi bojh uTha len

shayad koi chingari sulagti hui mil jae

aao to zara rakh ka ye Dher khangalen