qumquma 1

qumquma hai ki lab-e-bām liye baiThī hai

tīrgī apnī hathelī pe ujāle kī Dalī

jis ko ḳhud mauj-e-havā oT kiye baiThī hai

naqsh hairat banī taktī hai jise andhī galī

jaise kuchh duur añdhere kī kisī an-jānī

shāḳh pe ḳhanda-ba-lab ġhuncha ḳhāmoshī ho

raat kī gosh-bar-āvāz fazā meñ jaise

narm narm aañch kī jaagī huī sargoshī ho

kaash ye qumquma jugnū kī tarah uḌne lage

mujh tak aa pahuñche tasavvur kī ghanī chhāñv meñ

maiñ chalūñ rāh-e-taḳhayyul pe to palkeñ jhapke

TimTimātī huī parvāz mire paañv meñ

jāda-e-fikar kī amvāj baḌhtā baḌhtā jā.ūñ

ḳhud ko ghere se hue sapnoñ kī hasīnāoñ meñ

uḌte talvoñ ke madhur aks se jhalakātā huā

zau ke ā.īne ḳhayālāt ke dariyāoñ meñ

merī manzil ho koī man kā sunahrā Taapu

ghūmūñ jī bhar ke tilismī se kisī gaañv meñ

qumquma hai ki lab-e-baam liye baiThi hai

tirgi apni hatheli pe ujale ki Dali

jis ko KHud mauj-e-hawa oT kiye baiThi hai

naqsh hairat bani takti hai jise andhi gali

jaise kuchh dur andhere ki kisi an-jaani

shaKH pe KHanda-ba-lab ghuncha KHamoshi ho

raat ki gosh-bar-awaz faza mein jaise

narm narm aanch ki jagi hui sargoshi ho

kash ye qumquma jugnu ki tarah uDne lage

mujh tak aa pahunche tasawwur ki ghani chhanw mein

main chalun rah-e-taKHayyul pe to palken jhapke

TimTimati hui parwaz mere panw mein

jada-e-fikar ki amwaj baDhta baDhta jaun

KHud ko ghere se hue sapnon ki hasinaon mein

uDte talwon ke madhur aks se jhalakata hua

zau ke aaine KHayalat ke dariyaon mein

meri manzil ho koi man ka sunahra Tapu

ghumun ji bhar ke tilismi se kisi ganw mein