buland peDon ke sabz patton mein sath-e-dariya ki silwaTon par

buland peḌoñ ke sabz pattoñ meñ sat.h-e-dariyā kī silvaToñ par

havā ke jhoñkoñ se dhuup ke jhilmilāte taare thirak rahe haiñ

ḳhunuk havā jaise kāñch kī tez kircheñ rag rag ko chīrtī haiñ

ḳhunuk havā jaise talḳh mai kā.enāt ke jism meñ ravāñ hai

ye kashtiyāñ barf se Dhakī niilī choTiyoñ par nazar jamā.e

havā se Takrātī sard paanī ko kāTtī baḌhtī jā rahī haiñ

ye qahqahe shoḳh shoḳh bāteñ ye hañste chehroñ kā ek jhurmuT

nazar nazar meñ gudāz kirnoñ kī aañch mahsūs ho rahī hai

kisī kināre ke tiira sāyoñ meñ bhuul aa.e haiñ bār-e-ġham ko

vo barf kī choTiyāñ nigāhoñ ke dā.eroñ meñ bhar rahī haiñ

kahīñ bahut duur chhoḌ aa.e haiñ aaj behis imāratoñ ko

jo apne siine meñ tīrgī kā dhuāñ dabā.e sisak rahī thiiñ

sulagtī chiñgāriyāñ jahāñ baḌhtī raakh meñ dab ke so ga.ī thiiñ

jahāñ fasurda ġhubār meñ zindagī to kyā maut bhī nahīñ thī

kahīñ unhī choTiyoñ se ab vo imārateñ phir ubhar na aa.eñ

buland peDon ke sabz patton mein sath-e-dariya ki silwaTon par

hawa ke jhonkon se dhup ke jhilmilate tare thirak rahe hain

KHunuk hawa jaise kanch ki tez kirchen rag rag ko chirti hain

KHunuk hawa jaise talKH mai kaenat ke jism mein rawan hai

ye kashtiyan barf se Dhaki nili choTiyon par nazar jamae

hawa se Takraati sard pani ko kaTti baDhti ja rahi hain

ye qahqahe shoKH shoKH baaten ye hanste chehron ka ek jhurmuT

nazar nazar mein gudaz kirnon ki aanch mahsus ho rahi hai

kisi kinare ke tera sayon mein bhul aae hain bar-e-gham ko

wo barf ki choTiyan nigahon ke daeron mein bhar rahi hain

kahin bahut dur chhoD aae hain aaj behis imaraton ko

jo apne sine mein tirgi ka dhuan dabae sisak rahi thin

sulagti chingariyan jahan baDhti rakh mein dab ke so gai thin

jahan fasurda ghubar mein zindagi to kya maut bhi nahin thi

kahin unhi choTiyon se ab wo imaraten phir ubhar na aaen