aa ja

merī soī huī qismat ko jagāne aa jā

aa jā aa jā mirī bigḌī ko banāne aa jā

kho gayā aql kī rāhoñ meñ mirā ahd-e-shabāb

az-sar-e-nau mujhe dīvāna banāne aa jā

sard lāsha hai mirā ishq se ḳhālī siina

ik nayā soz na.ī aag lagāne aa jā

baaġh meñ phuul hai pazhmurda-o-pāmāl sabhī

har ravish par tū na.e phuul khilāne aa jā

kaan ab pak ga.e sun sun ke purāne naġhme

an-sune giit na.e raag sunāne aa jā

saḳht hamvār hai yaksāñ hai mirī rāh-e-hayāt

koī sahrā koī vīrāna dikhāne aa jā

zāhid-e-ḳhushk rahā ḳhauf-e-gunah se lekin

ab mohabbat kā gunahgār banāne aa jā

kaif ban jā mire dil kā merī nazroñ kā surūr

misl-e-bāda mirī rag rag meñ samāne aa jā

manzil-e-zīst kidhar hai nahīñ ma.alūm 'habīb'

thaam kar haath mujhe raah dikhāne aa jā

meri soi hui qismat ko jagane aa ja

aa ja aa ja meri bigDi ko banane aa ja

kho gaya aql ki rahon mein mera ahd-e-shabab

az-sar-e-nau mujhe diwana banane aa ja

sard lasha hai mera ishq se KHali sina

ek naya soz nai aag lagane aa ja

bagh mein phul hai pazhmurda-o-pamal sabhi

har rawish par tu nae phul khilane aa ja

kan ab pak gae sun sun ke purane naghme

an-sune git nae rag sunane aa ja

saKHt hamwar hai yaksan hai meri rah-e-hayat

koi sahra koi virana dikhane aa ja

zahid-e-KHushk raha KHauf-e-gunah se lekin

ab mohabbat ka gunahgar banane aa ja

kaif ban ja mere dil ka meri nazron ka surur

misl-e-baada meri rag rag mein samane aa ja

manzil-e-zist kidhar hai nahin malum 'habib'

tham kar hath mujhe rah dikhane aa ja