aadam-zad ki dua

zamīñ kī tañgiyoñ ko apnī baḳhshish se kushāda kar

ki sajda kar sakūñ

ye kyā ki mere hausloñ meñ rif.ateñ haiñ

aur girtā jā rahā huuñ apnī fitrat ke nasheboñ meñ

tirī kotāhiyāñ merī anā kī sarhadeñ haiñ

kyā ye dīvāreñ

sadā uThtī raheñgī mere siine par

batā ye rañgīñ ye dūriyāñ paidā huī haiñ

kis kī dānish se

batā mere lahū meñ Dūbte jaate haiñ kyoñ

injīr-o-zaitūñ ke giyā-histāñ

mujhe bhaa.ī mere nīlām karne jā rahe haiñ

tak rahā hai tū mujhe ma.azūr āñkhoñ kī safedī se

ye kaisā shahar hai

jis kī saqāfat kī machānoñ se

mujhe maarā gayā hai aur maiñ showcase meñ

laTkā huā huuñ

merā manzar dekhne vaale

likhī satroñ kī kaalī Doriyoñ par nāchte aate haiñ

ḳhud apne tamāshā.ī

batā baḌhtī huī ābādiyoñ meñ

chāñdnī kyoñ ghaT ga.ī hai

labrez palkeñ jhapakte qumqume āñkhoñ kā bhaiñgā-pan

na.e chaḌhte dinoñ kī surḳhiyāñ haiñ kyā

ḳhudāvand

mujhe taa.ir shajar parbat banā de

yā mujhe Dhā de

ki dobāra janm luuñ apnī be mashrūt āzādī kī ḳhvāhish se

zamin ki tangiyon ko apni baKHshish se kushada kar

ki sajda kar sakun

ye kya ki mere hauslon mein rifaten hain

aur girta ja raha hun apni fitrat ke nashebon mein

teri kotahiyan meri ana ki sarhaden hain

kya ye diwaren

sada uThti rahengi mere sine par

bata ye rangin ye duriyan paida hui hain

kis ki danish se

bata mere lahu mein Dubte jate hain kyon

injir-o-zaitun ke giya-histan

mujhe bhai mere nilam karne ja rahe hain

tak raha hai tu mujhe mazur aankhon ki safedi se

ye kaisa shahar hai

jis ki saqafat ki machanon se

mujhe mara gaya hai aur main showcase mein

laTka hua hun

mera manzar dekhne wale

likhi satron ki kali Doriyon par nachte aate hain

KHud apne tamashai

bata baDhti hui aabaadiyon mein

chandni kyon ghaT gai hai

labrez palken jhapakte qumqume aankhon ka bhainga-pan

nae chaDhte dinon ki surKHiyan hain kya

KHudawand

mujhe tair shajar parbat bana de

ya mujhe Dha de

ki dobara janm lun apni be mashrut aazadi ki KHwahish se