aadha-adhura shaKHs

Satyapal Anand

aadha-adhura shaKHs

Satyapal Anand

MORE BYSatyapal Anand

    hamārā roz ma.amūl thaa, sone se pahle

    bāteñ karne aur jhagaḌne

    gile-shikve ki jin meñ aglī pichhlī

    saarī bāteñ yaad kar ke rote-dhote the

    kabhī hañste bhī the to sirf kuchh lamhe

    zarā der meñ vaisā jhagḌā aur vahī ta.ane

    vahī sar pīTnā, aañsū bahānā, chīḳhnā, ronā

    yūñhī rote hue ḳhvāboñ ke dozaḳh meñ

    bhaTaknā, aur so jānā!

    guzishta shab bhī kuchh aisī hālat thī

    magar sone se pahle vo bahut tilmilāyā thā

    kahā thā maiñ chalā jā.ūñgā lekin tum

    faqat aadhe rah jāoge ik TuuTe khilaune se!

    mujhe ġhaiz-o-ġhazab ne jaise pāgal kar diyā thā

    dafa.a ho jaao! mirā tum se koī rishta nahīñ baaqī

    maiñ ḳhvāboñ ke dahakte dozaḳhoñ se sub.h niklā to huuñ

    lekin dekhtā kyā huuñ

    ki vo ġhā.eb hai pichhlī raat se

    mujh ko akelā chhoḌ kar jaane kahāñ anjān rāhoñ par

    bhaTaktā phir rahā hogā

    karūñ kyā maiñ? kahāñ DhūñDūñ use ab aisī hālat meñ?

    mire ghar ke makīno, rishta-e-dāro, ai galī vaalo

    mujhe yuuñ rassiyoñ se bāñdh kar

    zehnī marīzoñ ke shifā-ḳhāne meñ mat bhejo

    ki maiñ pāgal nahīñ huuñ, chīḳhtā, sar pīTtā to huuñ

    magar maiñ chīḳh kar us ko bulātā huuñ

    jo merā aadhā hissa hai

    jo merā dūsrā maiñ hai

    hamara roz ka mamul tha, sone se pahle

    baaten karne aur jhagaDne ka

    gile-shikwe ki jin mein agli pichhli

    sari baaten yaad kar ke rote-dhote the

    kabhi hanste bhi the to sirf kuchh lamhe

    zara si der mein waisa hi jhagDa aur wahi tane

    wahi sar piTna, aansu bahana, chiKHna, rona

    yunhi rote hue KHwabon ke dozaKH mein

    bhaTakna, aur so jaana!

    guzishta shab bhi kuchh aisi hi haalat thi

    magar sone se pahle wo bahut hi tilmilaya tha

    kaha tha main chala jaunga lekin tum

    faqat aadhe hi rah jaoge ek TuTe khilaune se!

    mujhe ghaiz-o-ghazab ne jaise pagal kar diya tha

    dafa ho jao! mera tum se koi rishta nahin baqi

    main KHwabon ke dahakte dozaKHon se subh nikla to hun

    lekin dekhta kya hun

    ki wo ghaeb hai pichhli raat se

    mujh ko akela chhoD kar jaane kahan anjaan rahon par

    bhaTakta phir raha hoga

    karun kya main? kahan DhunDun use ab aisi haalat mein?

    mere ghar ke makino, rishta-e-daro, ai gali walo

    mujhe yun rassiyon se bandh kar

    zehni marizon ke shifa-KHane mein mat bhejo

    ki main pagal nahin hun, chiKHta, sar piTta to hun

    magar main chiKH kar us ko bulata hun

    jo mera aadha hissa hai

    jo mera dusra main hai

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY