aadmi

jis qadar duniyā meñ maḳhlūqāt hai

sab se ashraf aadmī kī zaat hai

is kī paidā.ish meñ hai ulfat kā raaz

is kī hastī par hai ḳhud ḳhāliq ko naaz

is kī ḳhātir kul jahāñ paidā huā

ye zamīñ ye āsmāñ paidā huā

aql kā jauhar ise baḳhshā gayā

ilm kā zevar ise baḳhshā gayā

is ke sar meñ hai nihāñ aisā dimāġh

jis meñ raushan hai liyāqat kā charāġh

soch kar har kaam kar saktā hai ye

sher ko bhī raam kar saktā hai ye

ye safā.ī se chaTāneñ toḌ de

apnī dānā.ī se dariyā moḌ de

man-chalā hai is kī himmat hai buland

Daal saktā hai sitāroñ par kamand

is ko ḳhatroñ kī nahīñ parvā zarā

aag meñ kuudā ye suulī par chaḌhā

is ke har andāz meñ e.ajāz hai

arsh tak is nuur kī parvāz hai

is kī bātoñ meñ ajab tāsīr hai

ḳhaak kā putlā nahīñ iksīr hai

ye agar nekī ke ziine par chaḌhe

ek din saare farishtoñ se baḌhe

aur agar isyāñ kī daldal meñ phañse

is kā darja kam ho haivānāt se

ye kabhī ruī se baḌh kar narm hai

ye kabhī sūraj se baḌh kar garm hai

ek hālat par nahīñ is kā mizāj

har zamāne meñ badaltā hai rivāj

aur thā pahle ye ab kuchh aur hai

aa.e din is kā nirālā taur hai

is ne behad ruup badle aaj tak

is kī tadbīroñ se hairāñ hai falak

doctor tājir professor vakīl

in kā honā hai taraqqī kī dalīl

is ke pahlū meñ vo dil maujūd hai

jo bhaḌakne meñ nirā bārūd hai

rail gaaḌī radio motor jahāz

is kī ījādoñ kā qissa hai darāz

dast-kārī meñ baḌā mashshāq hai

jiddatoñ kā har ghaḌī mushtāq hai

khol āñkheñ jang kī raftār dekh

dekh is ke ḳhaufnāk auzār dekh

ye kahīñ hākim kahīñ mahkūm hai

ye kahīñ zālim kahīñ mazlūm hai

aadmī jab ġhair ke aage jhukā

ādamiyyat se bhaTaktā hī gayā

aadmī milnā bahut dushvār hai

ḳhud ḳhudā ko aadmī darkār hai

pyāre bachcho aadmī ban kar raho

har kisī ke saath hamdardī karo

sach agar pūchho to bas vo mard hai

jis ke dil meñ dūsroñ kā dard hai

'faiz' pahuñchātā nahīñ jo aadmī

us ko apnī zaat se hai dushmanī

us ko apnī zaat se hai dushmanī

jis qadar duniya mein maKHluqat hai

sab se ashraf aadmi ki zat hai

is ki paidaish mein hai ulfat ka raaz

is ki hasti par hai KHud KHaliq ko naz

is ki KHatir kul jahan paida hua

ye zamin ye aasman paida hua

aql ka jauhar ise baKHsha gaya

ilm ka zewar ise baKHsha gaya

is ke sar mein hai nihan aisa dimagh

jis mein raushan hai liyaqat ka charagh

soch kar har kaam kar sakta hai ye

sher ko bhi ram kar sakta hai ye

ye safai se chaTanen toD de

apni danai se dariya moD de

man-chala hai is ki himmat hai buland

Dal sakta hai sitaron par kamand

is ko KHatron ki nahin parwa zara

aag mein kuda ye suli par chaDha

is ke har andaz mein eajaz hai

arsh tak is nur ki parwaz hai

is ki baaton mein ajab tasir hai

KHak ka putla nahin iksir hai

ye agar neki ke zine par chaDhe

ek din sare farishton se baDhe

aur agar isyan ki daldal mein phanse

is ka darja kam ho haiwanat se

ye kabhi rui se baDh kar narm hai

ye kabhi suraj se baDh kar garm hai

ek haalat par nahin is ka mizaj

har zamane mein badalta hai riwaj

aur tha pahle ye ab kuchh aur hai

aae din is ka nirala taur hai

is ne behad rup badle aaj tak

is ki tadbiron se hairan hai falak

doctor tajir professor wakil

in ka hona hai taraqqi ki dalil

is ke pahlu mein wo dil maujud hai

jo bhaDakne mein nira barud hai

rail gaDi radio motor jahaz

is ki ijadon ka qissa hai daraaz

dast-kari mein baDa mashshaq hai

jiddaton ka har ghaDi mushtaq hai

khol aankhen jang ki raftar dekh

dekh is ke KHaufnak auzar dekh

ye kahin hakim kahin mahkum hai

ye kahin zalim kahin mazlum hai

aadmi jab ghair ke aage jhuka

aadamiyyat se bhaTakta hi gaya

aadmi milna bahut dushwar hai

KHud KHuda ko aadmi darkar hai

pyare bachcho aadmi ban kar raho

har kisi ke sath hamdardi karo

sach agar puchho to bas wo mard hai

jis ke dil mein dusron ka dard hai

'faiz' pahunchata nahin jo aadmi

us ko apni zat se hai dushmani

us ko apni zat se hai dushmani