aadmi

mujh ko mahsūr kiyā hai mirī āgāhī ne

maiñ na āfāq kā pāband na dīvāroñ kā

maiñ na shabnam kā parastār na añgāroñ kā

na ḳhalāoñ kā talabgār na sayyāroñ kā

zindagī dhuup kā maidān banī baiThī hai

apnā saaya bhī gurezāñ, tirā dāmāñ bhī ḳhafā

raat kā ruup bhī be-zār, charāġhāñ bhī ḳhafā

sub.h-e-hairāñ bhī ḳhafā, shām-e-harīfāñ bhī ḳhafā

ḳhud ko dekhā hai to is shakl se ḳhauf aatā hai

ek mub.ham sī sadā gumbad-e-aflāk meñ hai

tār-e-be-māya kisī dāman-e-sad-chāk meñ hai

ek chhoTī sī kiran mahr ke idrāk meñ hai

jaag ai ruuh kī azmat ki marī ḳhaak meñ hai

mujh ko mahsur kiya hai meri aagahi ne

main na aafaq ka paband na diwaron ka

main na shabnam ka parastar na angaron ka

na KHalaon ka talabgar na sayyaron ka

zindagi dhup ka maidan bani baiThi hai

apna saya bhi gurezan, tera daman bhi KHafa

raat ka rup bhi be-zar, charaghan bhi KHafa

subh-e-hairan bhi KHafa, sham-e-harifan bhi KHafa

KHud ko dekha hai to is shakl se KHauf aata hai

ek mubham si sada gumbad-e-aflak mein hai

tar-e-be-maya kisi daman-e-sad-chaak mein hai

ek chhoTi si kiran mahr ke idrak mein hai

jag ai ruh ki azmat ki mari KHak mein hai