aafat machchharon ki

aayā hai le ke mausam sauġhāt machchharoñ kī

har samt ho rahī hai barsāt machchharoñ kī

kam-zāt machchharoñ kī bad-zāt machchharoñ kī

ham ḳhuub jānte haiñ auqāt machchharoñ kī

dete haiñ hasb-e-ādat bīmāriyoñ ko dāvat

kar kar ke ham ziyāfat din-rāt machchharoñ kī

hai mājrā ye kaisā kyā qahr hai ḳhudā kā

nāzil jo ho rahī haiñ āfāt machchharoñ kī

aatī haiñ hañstī gaatī jaatī haiñ gungunātī

afvāj machchharoñ kī bārāt machchharoñ kī

bichchhū se bhī ziyāda zahrīle ho chuke haiñ

kuchh baḌh chukī hai itnī auqāt machchharoñ kī

phailā ke kyoñ ġhalāzat ālūdgī najāsat

karte haiñ parvarish kyoñ hālāt machchharoñ kī

har chiiz se anokhī har shai se haiñ nirālī

atvār machchharoñ ke harkāt machchharoñ kī

chaltī haiñ saa.eñ saa.eñ jab tez-tar havā.eñ

bantī haiñ bin banā.e kuchh baat machchharoñ kī

is daur meñ hai qillat har chiiz kī magar hai

ifrāt machchharoñ kī bohtāt machchharoñ kī

apnā lahū pilā kar ham log 'rāhī' aksar

karte rahe tavāzo.a din-rāt machchharoñ kī

aaya hai le ke mausam saughat machchharon ki

har samt ho rahi hai barsat machchharon ki

kam-zat machchharon ki bad-zat machchharon ki

hum KHub jaante hain auqat machchharon ki

dete hain hasb-e-adat bimariyon ko dawat

kar kar ke hum ziyafat din-raat machchharon ki

hai majra ye kaisa kya qahr hai KHuda ka

nazil jo ho rahi hain aafat machchharon ki

aati hain hansti gati jati hain gungunati

afwaj machchharon ki baraat machchharon ki

bichchhu se bhi ziyaada zahrile ho chuke hain

kuchh baDh chuki hai itni auqat machchharon ki

phaila ke kyon ghalazat aaludgi najasat

karte hain parwarish kyon haalat machchharon ki

har chiz se anokhi har shai se hain nirali

atwar machchharon ke harkat machchharon ki

chalti hain saen saen jab tez-tar hawaen

banti hain bin banae kuchh baat machchharon ki

is daur mein hai qillat har chiz ki magar hai

ifraat machchharon ki bohtat machchharon ki

apna lahu pila kar hum log 'rahi' aksar

karte rahe tawazoa din-raat machchharon ki