aaghaz-e-bahaar ka pahla din

masā.ib uljhaneñ be-tābiyāñ be-ḳhvābiyāñ likkhūñ

magar khetoñ kī shādābī

guloñ kī raunaqeñ kaliyoñ kā dhīmā husn raushan phuul angāre

falak par jagmagāte māh-o-anjum kā sajīlā-pan

sabā kī shoḳhiyāñ narmī havā kī gul kā pairāhan

jo manzar mujh se bāhar haiñ

kabhī lagtā hai shāyad mujh se behtar haiñ

kabhī lagtā hai mujh ko

ki vo be-tābiyāñ be-ḳhvābiyāñ jo mere andar haiñ

unheñ kaliyoñ kā dhīmā-pan sajāvaT māh-o-anjum kī achānak mil ga.ī jaise

sabā kī shoḳhiyoñ se gudgudāne vaale din aa.e

havā kā narm jhoñkā jo abhī āñchal se uljhā thā koī paiġhām laayā hai

guloñ kī raunaqeñ kaliyoñ kā dhīmā husn raushan phuul angāre

falak par jagmagāte māh-o-anjum kā sajīlā-pan

sabā kī shoḳhiyāñ narmī havā kī gul kā pairahan

ye manzar mere andar yuuñ utarte jā rahe haiñ

sabā kī shoḳhiyoñ se gudgudāne vaale din aa.e nahīñ to

aa rahe haiñ

masaib uljhanen be-tabiyan be-KHwabiyan likkhun

magar kheton ki shadabi

gulon ki raunaqen kaliyon ka dhima husn raushan phul angare

falak par jagmagate mah-o-anjum ka sajila-pan

saba ki shoKHiyan narmi hawa ki gul ka pairahan

jo manzar mujh se bahar hain

kabhi lagta hai shayad mujh se behtar hain

kabhi lagta hai mujh ko

ki wo be-tabiyan be-KHwabiyan jo mere andar hain

unhen kaliyon ka dhima-pan sajawaT mah-o-anjum ki achanak mil gai jaise

saba ki shoKHiyon se gudgudane wale din aae

hawa ka narm jhonka jo abhi aanchal se uljha tha koi paigham laya hai

gulon ki raunaqen kaliyon ka dhima husn raushan phul angare

falak par jagmagate mah-o-anjum ka sajila-pan

saba ki shoKHiyan narmi hawa ki gul ka pairahan

ye manzar mere andar yun utarte ja rahe hain

saba ki shoKHiyon se gudgudane wale din aae nahin to

aa rahe hain