aaj chali hai hawa

aaj chalī hai havā

muddatoñ ke ba.ad

hayāt se ta.alluq thā jis kā

har vo shai taras ga.ī

ki gosh ko tanaffus kī

sargam nasīb ho

sunā.ī de sarsarātī sī ek āvāz

koī sargoshī koī dastak ban kar

aatī jaatī jo mere qarīb ho

dast-e-māzī se joḌ apne baazū

yād-e-ayyām ke āġhosh meñ

gum-gashta dīda-e-tar chal paḌā

hai ek talāsh meñ

yā to āñkhoñ kī namī se chhuTkārā mile

yā phir dil kī umīdeñ bar aa.eñ

lekin ye kyā ki

is nā-murād khoj meñ

āñkheñ dar-ba-dar bhaTaktī huī

ḳhālī haath lauT kar

thakī-hārī ghar aa.eñ

tabhī chalne lagī havā mere baaġh meñ

daraḳhtoñ ke patte larazne lage

guloñ ke hasīñ laboñ par

tabassum ugā

aur ek nannhī sī lau jagī charāġh meñ

khulī havā meñ saañs lene kī ḳhvāhish

dil-e-nā-sāz meñ armāñ jagā ga.ī

ghuTan se tañg aa kar maiñ ne

phir kholī jo zanjīr-e-dar

kambaḳht havā kī sozish

chashm-e-nam sukhā ga.ī

aur charāġhoñ par raqs karte

sharāroñ ko bujhā ga.ī

aaj chali hai hawa

muddaton ke baad

hayat se talluq tha jis ka

har wo shai taras gai

ki gosh ko tanaffus ki

sargam nasib ho

sunai de sarsaraati si ek aawaz

koi sargoshi koi dastak ban kar

aati jati jo mere qarib ho

dast-e-mazi se joD apne bazu

yaad-e-ayyam ke aaghosh mein

gum-gashta dida-e-tar chal paDa

hai ek talash mein

ya to aankhon ki nami se chhuTkara mile

ya phir dil ki umiden bar aaen

lekin ye kya ki

is na-murad khoj mein

aankhen dar-ba-dar bhaTakti hui

KHali hath lauT kar

thaki-haari ghar aaen

tabhi chalne lagi hawa mere bagh mein

daraKHton ke patte larazne lage

gulon ke hasin labon par

tabassum uga

aur ek nannhi si lau jagi charagh mein

khuli hawa mein sans lene ki KHwahish

dil-e-na-saz mein arman jaga gai

ghuTan se tang aa kar main ne

phir kholi jo zanjir-e-dar

kambaKHt hawa ki sozish

chashm-e-nam sukha gai

aur charaghon par raqs karte

shararon ko bujha gai