aaj ka aKHbar

darvāze pe khaT se huī ik āvāz

aur maiñ chauñk ga.ī

zarūr hogā aaj kā aḳhbār

darvāza khol kar dekhā

merā andāza sahī nahīñ thā

vahāñ aḳhbār paḌā nahīñ thā

vahāñ thā aag kā ek golā

us meñ lipTī thiiñ

chand maslī huī ma.asūm kaliyāñ

kuchh gandī tang galiyāñ

bhuuk kā soz

aur kuchh zaḳhīra-andoz

be-roz-gārī kā sannāTā

ġhurbat kā chāñTā

sūkhā aur bāzār manda

saath meñ ḳhud-kushī kā thā phandā

sarhadoñ ke jhagḌe

jang

aur ek ḳhatra atom-bomb

kitne jangal

ghaTtī hariyālī

bīmārī

aspatāloñ kī bad-halī

ghoTāloñ kā shor

aur rishvat-ḳhorī kī hoḌ

zulm-o-sitam kī dāstāneñ

dhamākoñ kī āvāzeñ

dimāġh ghuum gayā

phir ġhaur se dekhā

are nahīñ

vo aaj kā aḳhbār hī thā

larazte kāñpte hāthoñ se uThā liyā

uThānā to thā hī nā

darwaze pe khaT se hui ek aawaz

aur main chaunk gai

zarur hoga aaj ka aKHbar

darwaza khol kar dekha

mera andaza sahi nahin tha

wahan aKHbar paDa nahin tha

wahan tha aag ka ek gola

us mein lipTi thin

chand masli hui masum kaliyan

kuchh gandi tang galiyan

bhuk ka soz

aur kuchh zaKHira-andoz

be-roz-gari ka sannaTa

ghurbat ka chanTa

sukha aur bazar manda

sath mein KHud-kushi ka tha phanda

sarhadon ke jhagDe

jang

aur ek KHatra atom-bomb

kitne jangal

ghaTti hariyali

bimari

aspatalon ki bad-hali

ghoTalon ka shor

aur rishwat-KHori ki hoD

zulm-o-sitam ki dastanen

dhamakon ki aawazen

dimagh ghum gaya

phir ghaur se dekha

are nahin

wo aaj ka aKHbar hi tha

larazte kanpte hathon se uTha liya

uThana to tha hi na