aaKHir-e-shab

na.ī sahar meñ dhuñdalke badalne vaale haiñ

chaman kī ḳhaak pe masrūf raqs-e-paiham hai

tamām josh-e-bahārāñ tamām sail-e-numū

ubal rahe haiñ surūr-e-ḳhudī ke favvāre

chhalak rahe haiñ nashāt-e-ḳhud-āgahī ke subū

chamak rahā hai fazā meñ ḳhulūs kā parcham

basī huī hai fazā meñ hayāt kī ḳhushbū

falak pe āḳhir-e-shab kī lakīr dauḌ chalī

zamīñ ne khol diye apne reshmīñ gesū

ḳhud apne kaif meñ sarshār bāda-e-ahmar

ḳhud apnī aag meñ betāb lāla-e-dil-jū

sukūt-e-shauq meñ Duube hue zamān-o-makāñ

tilism-e-husn se mā'mūr ‘ālam-e-man-o-tū

vo shāḳh-e-tāk jhukī rūh-e-nīstāñ jaagī

vo muskurā.e tarāne vo jagmagā.e kadū

ye āb-o-tāb na thī nīm-vā shagūfoñ meñ

mujhe yaqīñ hai ki mauj-e-havā meñ hai jaadū

vo raag chheḌ ga.ī hai nasīm-e-narm-ḳhirām

ki sho'la-zan hai rag-e-ḳhār-o-ḳhas meñ zauq-e-numū

na ab vo gardish-e-aflāk hai na dard-e-hayāt

na ab vo rishta-e-zunnār hai na zarf-e-vazū

tamām tauq-o-salāsil pighalne vaale haiñ

nai sahar mein dhundalke badalne wale hain

chaman ki KHak pe masruf raqs-e-paiham hai

tamam josh-e-bahaaran tamam sail-e-numu

ubal rahe hain surur-e-KHudi ke fawware

chhalak rahe hain nashat-e-KHud-agahi ke subu

chamak raha hai faza mein KHulus ka parcham

basi hui hai faza mein hayat ki KHushbu

falak pe aaKHir-e-shab ki lakir dauD chali

zamin ne khol diye apne reshmin gesu

KHud apne kaif mein sarshaar baada-e-ahmar

KHud apni aag mein betab lala-e-dil-ju

sukut-e-shauq mein Dube hue zaman-o-makan

tilism-e-husn se ma'mur ‘alam-e-man-o-tu

wo shaKH-e-tak jhuki ruh-e-nistan jagi

wo muskurae tarane wo jagmagae kadu

ye aab-o-tab na thi nim-wa shagufon mein

mujhe yaqin hai ki mauj-e-hawa mein hai jadu

wo rag chheD gai hai nasim-e-narm-KHiram

ki sho'la-zan hai rag-e-KHar-o-KHas mein zauq-e-numu

na ab wo gardish-e-aflak hai na dard-e-hayat

na ab wo rishta-e-zunnar hai na zarf-e-wazu

tamam tauq-o-salasil pighalne wale hain