aaKHiri Diary

pandrah roz alālat ke, aise guzre jin meñ bāham rābta na thā

phail gayā ik tanhā din tab dūsre tanhā din se milā

dhīre dhīre iiñT pe iiñT jamī

mere chāroñ taraf dīvār banī

pandrah roz ke ba.ad kahīñ ye zindāñ TuuTā

vāpas lauTā apnī duniyā meñ

sab kuchh vaise hī paḌā hai jaise chhoḌ gayā thā

mez usī tarah tirchhī rakkhī hai

rack se ek kitāb nikālī thī yūñhī khulī paḌī hai

dhuup utartī dhuup mirī almārī ke aadhe paT par rukī huī hai

ab vo yahīñ se vāpas ho jā.egī

jaise us kī hadeñ hamesha se muqarrar haiñ

jaise mere hone na hone kā koī farq nahīñ

khiḌkī se phir vahī havā.eñ lauT aa.iiñ haiñ

mere siine meñ jo saañs kī sūrat tair chukī haiñ

biite pandrah dinoñ meñ shāyad vo ajdād kī taskīñ kā sāmān banī hoñ

vo ḳhush hoñ mere siine ke bhatte se un kā tanaffus chaltā hai

mire zariye vo is duniyā meñ ab bhī jaarī aur saarī haiñ

lekin ab to un kā shajar duur duur tak phail gayā hai

un ke jārī-sārī rahne kā ehsās mire hone na hone kā pāband nahīñ

maiñ jo nahīñ thā sab kuchh vaise hī rukā paḌā hai

bed se ek adhūrā ḳhat ab bhī jhāñk rahā hai

ye ḳhat maiñ ne tum ko likkhā thā

kamre ke goshe meñ dubkā sannāTā

merā hamesha kā hamrāz vahī sannāTā lauT aayā hai

sargoshī meñ mujh se kahtā hai

tum is ḳhat se umr meñ pandrah roz baḌe ho

us din vo saarī bāteñ kitnī sachchī thīñ!

vo sachchā.ī aTal hai

vahīñ khaḌī hai

merī saarī nazmoñ kī mānind

jo merī biitī sāñsoñ kā katba haiñ

zinda haiñ pā.inda haiñ

mere hone na hone kī pāband nahīñ

pandrah roz alalat ke, aise guzre jin mein baham rabta na tha

phail gaya ek tanha din tab dusre tanha din se mila

dhire dhire inT pe inT jami

mere chaaron taraf diwar bani

pandrah roz ke baad kahin ye zindan TuTa

wapas lauTa apni duniya mein

sab kuchh waise hi paDa hai jaise chhoD gaya tha

mez usi tarah tirchhi rakkhi hai

rack se ek kitab nikali thi yunhi khuli paDi hai

dhup utarti dhup meri almari ke aadhe paT par ruki hui hai

ab wo yahin se wapas ho jaegi

jaise us ki haden hamesha se muqarrar hain

jaise mere hone na hone ka koi farq nahin

khiDki se phir wahi hawaen lauT aain hain

mere sine mein jo sans ki surat tair chuki hain

bite pandrah dinon mein shayad wo ajdad ki taskin ka saman bani hon

wo KHush hon mere sine ke bhatte se un ka tanaffus chalta hai

mere zariye wo is duniya mein ab bhi jari aur sari hain

lekin ab to un ka shajar dur dur tak phail gaya hai

un ke jari-sari rahne ka ehsas mere hone na hone ka paband nahin

main jo nahin tha sab kuchh waise hi ruka paDa hai

bed se ek adhura KHat ab bhi jhank raha hai

ye KHat main ne tum ko likkha tha

kamre ke goshe mein dubka sannaTa

mera hamesha ka hamraaz wahi sannaTa lauT aaya hai

sargoshi mein mujh se kahta hai

tum is KHat se umr mein pandrah roz baDe ho

us din wo sari baaten kitni sachchi thin!

wo sachchai aTal hai

wahin khaDi hai

meri sari nazmon ki manind

jo meri biti sanson ka katba hain

zinda hain painda hain

mere hone na hone ki paband nahin